Добрым людзям на здароўе
Студэнты біялагічнага факультэта групы БІ-21 пад кіраўніцтвам загадчыка кафедры беларускай культуры і фалькларыстыкі ГДУ імя Ф. Скарыны Валянціны Новак падрыхтавалі цудоўнае фальклорнае свята “Каляды” і выступілі перад чытачамі Славянскай бібліятэкі.
Перад паказам абраду расказалі аб тым, як калядавалі ў вёсках розных раёнаў Гомельскай вобласці. Узнаўленне студэнтамі на сцэне маляўнічых фрагментаў, звязаных са святкаваннем Калядаў, дапаўнялася асобнымі каментарыямі доктара філалагічных навук, прафесара Валянціны Новак, якая імкнулася пазнаёміць гледачоў з семантыкай асноўных рытуалаў, звязаных са святкаваннем першай урачыстай, але “галоднай” куцці, другой багатай “мясной”, шчодрай куцці, трэцяй куцці, звязанай з Вадохрышчам.
Вядучы метадыст па этнаграфіі і фальклору цэнтра народнай творчасці Ірына Глушэц узнавіла аўтэнтычныя калядныя песні “Добры вечар таму, хто ў гэтым даму”, “Пайшла Каляда...”, “Каляды, калядкі”.
Парадавалі і акцёрскі талент студэнтаў, і іх харэаграфічныя здольнасці. Разгадванне загадак паяднала і гледачоў, і ўдзельнікаў калядных святкаванняў, бо ўсім хацелася атрымаць прызы.