Нашчадкі Вялікай Перамогі

Лаўрэатаў узнагародзілі на радзіме вядомага беларускага пісьменніка Івана Сяркова, у Пакалюбіцкай сярэдняй школе Гомельскага раёна

Сёлета конкурс праводзіўся ўпершыню ў рамках Дагавора аб супрацоўніцтве паміж адміністрацыяй Няклінаўскага раёна Растоўскай вобласці Расійскай Федэрацыі і Гомельскім райвыканкамам на 2019–2021 гады.

Зазначым: конкурс праходзіў і ў межах культурна-адукацыйнага праекта «Берагі дружбы», а таксама міжнароднага фестывалю-свята «Славянскія літаратурныя дажынкі», які праводзіцца ў Гомелі і Гомельскім раёне абласным аддзяленнем Саюза пісьменнікаў Беларусі з 2005 года.

Удзельнікамі сёлетняга творчага спаборніцтва былі вучні Растоўскай і Гомельскай абласцей ва ўзросце ад 12 да 17 гадоў. Разам з тым, конкурс меў адкрыты характар – у ім мелі магчымасць прыняць удзел юныя прадстаўнікі з іншых рэгіёнаў Расіі і Беларусі. Свае працы вучні накіроўвалі на конкурс у чатырох намінацыях.

Паступіла каля сотні работ, напісаных юнымі канкурсантамі. Актыўнасць у творчым спаборніцтве праявілі і школьнікі, навучэнцы гімназій і каледжаў Гомельшчыны.

Вучаніца Пакалюбіцкай СШ Таццяна Шутава напісала пра народнага пісьменніка Беларусі Івана Мележа: «Яму было ўсяго 20 гадоў, калі пачалася Вялікая Айчынная вайна. Так здарылася, што служба закінула нашага земляка далёка ад роднага краю. Іван Мележ знаходзіўся ў розных кутках СССР, але не апусціў рукі, нават калі быў сур’ёзна паранены. Будучы вядомы беларускі пісьменнік абараняў і Растоўна-Доне, у якім ішлі лютыя баі. Памяць пра нашага земляка і сёння жыве ў сэрцах жыхароў Расіі. Гэтак жа, як і мы, беларусы, яны шануюць унёсак Івана Паўлавіча ў вызваленне Растоўскай вобласці…»

Гонар за здзейсненае гучыць і ў вершы «Ветэран» аўтарапачаткоўца, навучэнца педагагічнага каледжа імя Л. С. Выгоцкага Рыгора Канаплянікава: …А ты несешь цветы тому, Кто пал в бою

ожесточенном… – Таццяна мае рацыю, калі падкрэслівае, што нашага земляка Івана Мележа памятаюць, шануюць дома, яго імем названы розныя ўстановы і вуліцы Беларусі, – зазначыў кіраўнік абласной пісьменніцкай арганізацыі Уладзімір Гаўрыловіч, уручаючы сертыфікат і дыплом пераможцы. – Нядаўна, дзякуючы развіццю творчых кантактаў літаратараў нашых абласцей, імем Івана Мележа названа Пятрушынская бібліятэка ў Няклінаўскім раёне Растоўскай вобласці. Гэта якраз і пацвярджае, што нашы сэрцы, сэрцы беларусаў і рускіх, па-ранейшаму б’юцца ва ўнісон.

Падзячны ліст атрымала і настаўніца Таццяны Шутавай – Ганна Іванаўна Макаранка. Лаўрэатаў чакаў яшчэ адзін сюрпрыз. Па выніках конкурсу выдадзены зборнікі лепшых тэматычных сачыненняў «Літаратурны дэбют», а таксама вершаў і паэтычных перакладаў «Нашчадкі Вялікай Перамогі». Яны падораны школе, пераможцам і лаўрэатам конкурсу.