別把緬甸落下了

Capital (HK) - - From The Editor編者語 -

香港人對緬甸的印象可能除了知道有個昂山素姬同出產翡翠外,未必講得出其他。不過,早前出席香港緬甸商會在洲際酒店舉辦歡迎緬甸規劃及財政副部長吳色昂的晚宴上,先知道原來緬甸的號召力咁大。單係贊助當晚晚宴的機構就有十多家,而且唔少仲係響噹噹的金融機構,由此可見緬甸的吸引力同發展潛力真係不容忽視。

歡迎晚宴冠蓋雲集

當晚除緬甸經貿代表團外,港緬雙方仲有好多官員出席,包括昂山素姬高級顧問貝偉賢、商務及經濟發展局副局長陳百里、商務及經濟發展局局長政治助理馮海容、香港工業貿易署署長甄美薇、緬甸駐港總領事副領事 Kyaw Zay Yar Lin同英國駐港澳總領事賀恩德等。

另外本港亦有唔少商界領袖及學者出席晚宴交流意見,包括數碼港主席林家禮、科學園主席羅范椒芬、友邦保險區域 CEO 蔡強、浸會大學副校長周偉立、科技大學首席副校長史維、城市大學商學院管理科學系助理院長郝剛、嶺南大學商學院院長劉黎明,同埋澳門工商管理學院黎寧等超過500 名賓客,宴會會場直頭係座無虛席。

話說大約兩年前,昂山素姬掌權後得到美國大力支持,解除多年的禁運制裁,緬甸發展開始受到各界關注。舊年9月,特首林鄭月娥率團訪問緬甸後,進一步鼓勵港商去當地投資,當然亦唔少得中國的一帶一路倡議。作為成員國之一的緬甸,近年積極進行根本性的政治和經濟改革,實力開始從後趕上,衍生唔少投資機遇。目前中國係緬甸最大的貿易夥伴同投資者,去年首三季雙邊貿易接近 90億美元,全年中國對緬甸的投資額接近 200 億美元,主要投資港口、工業園、交通基建、能源及銀行業等。

緬甸工人純樸踏實

據一名多年前已經在緬甸從事IT 事業的投資者話,唔少珠三角投資的港商受到成本大增影響,近年陸續將工廠搬到東南亞一帶,但就發覺比起越南同印尼,緬甸工人更加純樸踏實,任勞任怨,好值得在當地投資。

其實香港目前同緬甸的貿易交往唔算太多,去年頭七月,在香港對東盟十國的出口中,對緬甸的出口僅佔0.9%。緬甸輸入的香港出口產品總值,在東盟排名第八。而香港出口至緬甸的產品主要係塑膠製板、片、膜、箔及帶,仲有光學產品等。

Newspapers in Chinese (Traditional)

Newspapers from China

© PressReader. All rights reserved.