新婚甜蜜返港

陳凱琳爆嘉穎機艙跪地求婚

Oriental Sunday - - Contents -

49歲嘅鄭嘉穎同27歲嘅陳凱琳,上周日(12日)喺印尼峇里結婚,日前鄭生、鄭太終於都返港喇!二人受訪時全程十指緊扣,笑容滿臉,Grace更不時用冧爆嘅眼神望住老公,sweet到漏!現場記者稱Grace做鄭太,Grace冧笑話好唔慣:「空姐拎嘢飲嚟,佢話恭喜晒鄭生鄭太,原來佢叫緊我哋,感覺好得意。」在旁嘅嘉穎話慢慢就慣。連日在峇里二人都係周圍食美食,過得好開心,講到日前係鄭嘉穎生日,問到太太送咩禮物,鄭嘉穎話最好嘅禮物就係娶咗陳凱琳。問會唔會想生豬BB?嘉穎就答:「都好嘅,豬仔係福氣。」陳凱琳話奶奶冇畀壓力,又話二人有共識,又喜歡小朋友。提到接新娘時嘉穎唱咗自己嗰首〈一千個願意〉,嘉穎解釋當中意義:「平時我會喺屋企練吓歌嘅,呢隻都係練歌嘅其中一隻嚟,Grace聽到話好鍾意又 問:『歌詞係咪講我㗎?』所以接新娘時佢要求我唱歌時,我已經知佢想聽邊隻。」講到接新娘過程,鄭嘉穎笑話:「啲姊妹同伴娘都好幫手,我嗰啲兄弟就掛住拍片,亦都唔多出聲,靠我一個人搞掂。」一直情深望住老公嘅Grace大讚:「好叻呀你!」鄭生鄭太閃爆機場翌日,Grace已復工出席活動,新婚嘅佢份外明艷照人,仲大爆嘉穎求婚過程:「喺上年聖誕節嘉穎陪我返加拿大,喺飛機上求婚嘅,好驚喜,嘉穎要去洗手間,佢叫我千祈唔好瞓,我係合埋對眼抖一抖,佢返嚟就拎住戒指跪咗喺度,個位又好窄,佢咁做我好感動,依家坐飛機都會諗番當時情景。」再一次祝鄭生鄭太幸福快樂呀!

鄭嘉穎、陳凱琳接近凌晨12時步出離境大堂,攬到實見傳媒,現場記者恭賀新婚快樂,鄭生鄭太都笑到四萬咁口! ▼嘉穎獨力搬行李,然後單手推行李車,另一隻手拖實老婆仔,man爆!

Newspapers in Chinese (Traditional)

Newspapers from China

© PressReader. All rights reserved.