契媽們兩文三語教學杏兒囝囝聽到一頭霧水

Oriental Sunday - - 太 八姨 手記 -

胡杏兒舊年10月生咗囝囝李奕霆( Brendan),一向可愛到暈嘅Baby Lee大受一眾「胡說八道會」嘅契媽們愛錫,幾乎每人一有空閒時間就去探吓佢。最近,李施嬅、胡定欣、黃智雯、胡蓓蔚及姚子羚呢班契媽難得齊腳,唔係去扮靚或high tea而係去杏兒屋企,表面家訪探杏兒,實質係見吓佢哋個寶貝契仔Baby Lee!難得齊腳胡說八道會成員都喺個人社交網上載齊人大合照,除咗班姊妹難得齊人,亮點都落在萌爆又好好肉地嘅Baby Lee身上。呢班契媽大部分未嫁更加未有小朋友,不過對住契仔就母愛氾濫,不但爭住抱契仔,仲同Baby Lee一齊story time㖭,輪住嚟個三語教學,首先係有姚子羚嘅普通話,仲有胡蓓蔚嘅上海話,然後到李施嬅嘅英文!不過未夠1歲嘅Baby Lee眼仔碌碌望住成班靚靚契媽,唔知發生咩事咁樣,之後仲突然開心拍手,氹得班契媽冧到唔捨得走!Baby Lee真係幸福,有咁多靚契媽錫錫!

▼胡說八道6個好姊妹難得一齊放到假,唔係約埋去shopping,而係一齊衝去胡杏兒屋企探吓佢囝囝Baby Lee,一齊影合照時,Baby Lee仲一齊望鏡㖭,可愛到暈!

▲企喺最前嘅定欣留言話可唔可以下次由Baby Lee揸機,因為佢個頭最細,唔使好似依家咁定欣個頭顯得最大。Baby Lee望住班契媽,個樣又係得意到爆炸!唔知係咪為咗契仔準備將來入學,班契媽爭住兩文三語同佢說故事,首先係半個台灣妹嘅姚子羚講普通話。

▲到Baby Lee飲奶時間,班契媽爭住一個拎奶樽,黃智雯仲捉住契仔對腳仔放喺塊臉度,黃智雯一臉滿足嘅冧樣,睇嚟佢好鍾意契仔對腳,仲留言話:「多謝Brendan送上我最愛的金華火腿一對」,就知有幾冧!

Newspapers in Chinese (Traditional)

Newspapers from China

© PressReader. All rights reserved.