陳展鵬急娶單文柔

高人批愈生愈旺

Oriental Sunday - - CONTENTS -

41歲的陳展鵬周一(10日)發出多張早前與女友單文柔遠赴英法影的婚紗照,宣布下月迎娶28歲的單文柔,選擇在胡定欣的生日周公布喜訊,唔多唔少有贈興的意味。拍拖年半突然拉埋,全因陳展鵬極之迷信,過去多年遇上心儀對象,他都會找風水師指點迷津,希望找個旺自身的最佳伴侶。去年3月與單文柔在山頂匿車廂開餐被斷正,公開戀情後陳展鵬事業停滯不前,年初其母中風入院,又被業主爆料指毀約欠租兼搞爛間屋,諸事不順的陳展鵬即搵高人求救,知道單文柔在命理上與他相合,婚婚後定必旺夫,而且愈生小朋友就愈旺。絕對信邪的的陳展鵬急急行動,兩度求婚才娶得文柔歸,希望快結婚讓母親飲新抱茶。單文柔咁快就可以疊埋心水做陳太,目標為本為陳家開枝散葉,唔使再捱世界做美女學徒啦!

圈中藝人多圈中藝人多篤信風水命理,陳展鵬亦唔例外,自11年起他租住將軍澳維景灣畔,定時搵風水師上門睇風水,近年事業起飛做埋視帝,煎Pang更將之前租住的維景灣畔兩房單位視為風水屋。不過,去年在風水師教路下,他搬去另一個向海單位,可惜入住後事業竟大不如前,年初母親更突然中風入院,事事不如意他就歸咎風水出問題,租約未滿亦堅持要搬走,因未履行合約引發軒然大波,今年6月被業主爆料指毀約欠租兼搞爛間屋。雙方各執一詞,煎Pang更向記者發毒誓表示:「我做過雙手跛!」

媾女都要指點

極之迷信的煎Pang由入行改名到搬屋入伙等人生大小事,都定必搵風水師指點迷津,據知他與堪輿學家楊皓雲十分熟絡,近年楊師傅生日甚至搬辦公室,煎Pang都會帶同父母一齊到賀。據知情者透露:「煎Pang最鍾意搵師傅去佢屋企擺陣,一搬入維景,佢就簽埋無綫做親生仔,發展愈嚟愈好,之後憑《巨輪》走紅,冇耐仲攞埋視帝,事業一帆風順,佢當正間屋係風水屋。除咗事業,媾女都要搵師傅夾過睇吓個女仔旺唔旺佢,佢知道同胡定欣唔太夾,但Phoebe(單文柔)各方面都好夾佢,婚後生埋小朋友仲愈來愈旺,所以煎Pang同Phoebe拍拖冇耐已經認定對方係老婆,再加上Phoebe好得佢父母心,鵬母中風後,Phoebe亦好照顧老人家,向來孝順的煎Pang更加覺得呢個女仔娶得過。」

事實上,身為家中獨子的煎Pang自小與父母感情甚好,03年他在藍田匯景花園買了第一個物業送給父親,去年10月再斥資1,280萬買入晉海極高層3房單位送贈父母,當日更由煎Pang父母到場揀樓。即使與單文柔拍拖不久便同居,煎Pang都堅持與母親同住,年初鵬母中風,煎Pang非常擔心,至今母親行動仍不便,煎Pang除了與單文柔日夜照顧外,更請了外傭24小時貼身侍候母親。

盡快讓母抱孫

迷信到一個點的陳展鵬,深信辦喜事可以為家中有病的老人家沖喜,與單文柔商量後,知道女友想先結婚後生仔,他亦事不宜遲,年中已向公司請假,與單文柔先到法國及英國影婚紗照,返港後即籌備下月舉行的小型婚宴。知情者透露:「鵬母真係好想抱孫,煎Pang同Phoebe亦有共識,目標係三年抱兩,好似陳豪陳茵媺咁四年抱三有仔有女都唔錯,煎Pang仲話Phoebe會專心生B同湊仔,搵奶粉錢同養家就由佢一力承擔。」

未成婚已錫住老婆的煎Pang,在英法影的結婚照幸福滿瀉,煎Pang更解釋為何會在英法取景:「英國係Phoebe讀書嘅地方,係佢好鍾意嘅地方,所以喺英國做呢個畫面出嚟,希望佢留住呢刻回憶啦!」他更自爆是在香港求婚,本來想去外國酒莊搞婚禮,但因為老人家不便搭飛機,所以改在香港結婚。對於生B大計,煎Pang恨到出面答:「我都想四喜臨門㖭,一次搞掂!」

浪子自動封盤

入行多年的煎Pang情史不少,08年他承認與亞姐姚嘉雯拍拖兼同居,但戀情僅維持三年;13年與鍾嘉欣合拍劇集《巨輪》時被指做「柴可夫」接送對方,因發生交通意外令「戀情」曝光;兩年前拍《城寨英雄》又與胡定欣因愛成恨,亦曾與黃智雯及蔡思貝等花旦合作而傳緋聞。16年落選港姐單文柔能夠令煎Pang為她放棄整個森林,除了因為她八字旺夫之外,亦有其過人之處。據知單文柔人如其名斯文又溫柔,拍拖不久已令煎Pang自動波與其他異性保持距離,更刪除社交網上其他女藝人的帳戶,給單文柔百分百的安全感。為了取悅男友,單文柔又去學烹飪,最重要是她具有做賢妻良母的特質,不重名利,肯退下火線結婚生仔,這點足以令煎Pang對她死心塌地。

單文柔接受傳媒訪問,大爆煎Pang求過兩次婚,第一次在香港趁她睡覺時,用一隻自己摺的心形紙戒指套在她的手指上,待她醒後才發現,雖然好冧但單文柔都say no,第二次在英國,煎Pang在人流甚多又有巴士的大街再跪低求婚,這次單文柔最期待的畫面終於出現,如此感動當然點頭say yes啦!既然搵到個可以保平安同包順風順水的單文柔,堪稱史上最強旺夫老婆,唔知師傅有冇指點煎Pang,將老婆放家中邊個位最有利呢?

Newspapers in Chinese (Traditional)

Newspapers from China

© PressReader. All rights reserved.