隔絕奶奶親孫

Oriental Sunday - - 太 八姨 手記 -

為體驗做露宿者,城城的造型十分潦倒,因為留鬚搞到個女認唔到爸爸,除了要拍攝去摷垃圾的戲份,城城更刻意捱餓令自己代入角色,拍到入晒戲,回家便不多出聲,亦因為情緒低落有時會在片場失控,甚至發脾氣鬧人。

令城城鬧情緒又點止工作咁簡單,據知方媛自從坐正做城嫂後水鬼升城隍,恃住為郭家生了女兒開始坐大,再加上其父母去年開始長期留港湊孫,人多勢力大,相對城城母親勢孤力弱,與孫女見面時間少之又少,知情者透露:「城城知道阿媽想抱孫,所以先趕生B,之前亦安排阿媽同住,希望佢成日都可以見到個孫,點知方媛父母落嚟話幫手湊B,最後喺城城樓下租住單位,B女就長期交由婆婆負責照顧,方媛全家日日霸住個女,嫲嫲有時想同個孫女玩吓都唔得。城城真係左右做人難,但佢又成日唔喺香港,根本控制唔到屋企情況,夾喺中間做晒磨心,最慘就係佢仲要冧個老婆幫佢繼續生,又要靠岳父岳母幫佢睇頭睇尾,所以城城一方面安撫阿媽,話遲啲會再生多幾個孫畀佢玩,另一方面就氹方媛叫佢專心留喺屋企湊女,同埋準備好迎接第二胎,唔好成日掛住佢盤網上時裝生意。」城堡上演宮心計,分分鐘好睇過做戲,方嫂手持生仔免死金牌,絕對一人獨大!

Newspapers in Chinese (Traditional)

Newspapers from China

© PressReader. All rights reserved.