《愛•回家》上下齊撐「Terry」與圈外女友結婚

Oriental Sunday - - Contents -

憑無綫處境劇《愛•回家之開心速遞》Terry一角而為人所識嘅李偉健周日(14日)同拍拖逾10年嘅圈外女友阿寶結婚,《愛•回家》辦喜事咁大件事,一班同劇演員唔單止總動員出席祝賀,仲分工合作為好兄弟嘅婚禮出一分力!好似「大小姐」林淑敏同「送水輝」許家傑幫手做司儀搞氣氛,而胡渭康獻唱〈為妳鍾情〉引領一對新人進場,馬貫東、周嘉洛、阮政峰、李霖恩則擔任兄弟團,「舅父」歐瑞偉致賀辭,仲有鄭世豪上台獻唱〈聽你說願意〉,場面溫馨熱鬧。

李偉健於婚宴中上台向太太發表愛的宣言,情深款款同愛妻講:「我愛你!有10蚊畀9蚊你!要你幸福快樂!」令新娘子一度感動到講唔到說話,仲喊咗出嚟。李偉健透露接新娘過程尚算順利,多得一班兄弟捱義氣幫手玩遊戲兼被玩,仲笑指開門利是微薄,姊妹團肯收貨已經好好。李偉健話完成婚禮翌日要如常開工,計劃之後先同老婆到日本補度蜜月,過一、兩年二人世界至計劃生B。

▲兄弟團成員阮政峰搞笑抱怨接新娘時被玩殘:「佢哋都冇顧我感受,我幾乎腎病,因為啲飲品係甜酸苦辣,本身我好驚鹹嘅飲品,但最後成杯飲晒,全日肚痛要去廁所到依家仲痛緊。」

▲《愛• 回家》辦喜事,全劇總動員出席祝賀,唔少人更攜同家眷現身㖭! 李偉健於圈中人緣極好,《愛•回家》上下包括:劉丹、單立文、湯盈盈、樊奕敏、羅樂林、姚瑩瑩等均有出席,相當熱鬧!

▲現年39歲嘅李偉健同圈外女友阿寶正式拉埋天窗,《愛•回家》一班好兄弟周嘉洛、阮政峰、馬貫東及李霖恩則擔任兄弟團。

Newspapers in Chinese (Traditional)

Newspapers from China

© PressReader. All rights reserved.