有前輩教路

Oriental Sunday - - 太 八姨 手記 -

2014年何廣沛事業終於有轉機,被當年他在藝訓班的導師鄭丹瑞以及前輩吳啟華欽點,第一次有機會孭重戲,拍攝劇集《女人俱樂部》做年輕版吳啟華,不過第一次拍重頭劇,一直做閒角冇乜演出經驗的他,一開始就不停碰釘。據何廣沛好友透露:「嗰時佢仲細,根本唔知天高地厚,接到劇本已經好開心,以為背熟晒就一定掂,點知入到廠又係另一回事,不停出錯係咁NG,幾乎日日都畀導演鬧爆,有段時間佢都好唔開心,但佢性格執著,覺得人哋做到自己唔會做唔到,又肯虛心問人,好多前輩都肯教佢!捱咗一段時間,已經捉到晒路!」

苦盡甘來,上年何廣沛事業成功起飛,連拍兩套劇《親親我好媽》及《超時空男臣》開始廣為人識,近日一套《跳躍生命線》更成功爆紅入晒屋。爆騷收入增加,上年終於可以畀家用屋企,據知情者透露:「捱咗咁多年,佢都係上年做完《超時空男臣》開始紅,多咗接外邊工作,先第一次畀到家用屋企!佢依家最大心願,係希望可以儲到錢買樓,等屋企人唔使再為佢將來擔心!」

被網民睇好成為今年《萬千星輝頒獎典禮》「飛躍進步男藝人」大熱,何廣沛拍《跳躍生命線》跳埋入直路,今年還有四套劇未播,當紮男神仲有排紅!

▼經驗淺孭重戲,何廣沛一拍就出事,因經常出錯NG被導演鬧爆,有指鬧得佢最甘嘅,係出名要求高的導演陳維冠。 ▼14年獲得阿旦(鄭丹瑞)欽點,拍攝重頭劇《女人俱樂部》,劇中做年輕版吳啟華。 ▼16年《律政強人》演方中信徒弟,戲份開始多。 ▼拍完《女人俱樂部》,何廣沛繼續做閒角,在《巾幗梟雄之諜血長天》,就做其中一名游擊隊員。 ▼上年連拍兩套劇《親親我好媽》及《超時空男臣》,演出被讚成功入屋!

Newspapers in Chinese (Traditional)

Newspapers from China

© PressReader. All rights reserved.