ولا تزعل نفسك

مبقتش عارف أضحك ولا أعيط على حال البلد اللى ضيعت من عمرها 5 سنين على الفاضى، وعشان كده قررت لا أجدد الرخصة من أساسه ولا أروح انتخب حد لبرلمان بقيت عارف للأسف أنه لا هايقدم ولا يأخر.

Ain El Machahir - - مق/ال - عبدالله غلوش facebook.com / AG3in

يوم الأح�د الماضى قلت أروح أج�دد الرخصة قبل ما أروح على اللجنة انتخب، ولو إنى معرفش أصلا مين اللى نازل ولا اللجنة بتاعتى المفروض تنتخب 2 مرشحين ولا تلاتة ولا أربعة؟ المهم روحت وحدة مرور الهرم الجديدة فى شارع الليبينى، وهناك أول ما تدخل هتلاقى فوق شباك تجديد الرخص يافطة كبيرة مكتوب عليها «فى إطار حرص وزارة الداخلية فى التيسير على المواطنين أصبح من الممكن دف�ع المخالفات وتجديد الرخصة واستلامها وأنت فى بيتك من خلال خدمة فورى» أول ما شفتها قلت إيه الحلاوة دى وتحيا مصر.. وانتابتنى القشعريرة، وقمت رايح محل فيه خدمة فورى ودفعت المخالفات والتأمين الإجبارى، وجاى ادفع التجديد الراجل قاللى فى عطل فى الخدمة هياخد بتاع أسبوعين، روح حضرتك بالوصلين دول المرور ومتدفعش غير ضريبة الرخصة بس، قلت تمام وزى الفل وادينا وفرنا طابورين، وقلت ابقى أصوت يوم الاتنين طالما كده كده اللجان فاضية وهاخلص بسرعة، وفعلا يوم الاتنين روحت المرور مرة تانية ومعايا الوصلين بتوع خدمة فورى، وهناك الراجل اللى على الشباك قالى لا إحنا مش بنعترف بخدمة فورى دى حضرتك ولازم تعمل الورق ده كله من أول وجديد ولو مش مصدقنى ممكن تروح تشتكى لرئيس الوحدة، دخلت لرئيس الوحدة يقولى أي�وه حضرتك احنا مش بنعترف بفورى والكلام ده، أقوله بس أنا دفعت، يقولى أنا ماليش غير بختم النسر، أقوله طب وإيه لازمة اليافطة اللى حاطينها بره اللى بتقول ممكن تجدد عن طريق خدمة فورى؟ لاقيته راح منادى على عسكرى قاله: هاتلى يا بنى اليفط اللى بره، جابها وحطها جنبه وقاللى ولا تزعل نفسك أدينا شلناها أهى.. بصراحة وقتها مبقتش عارف اضحك ولا أعيط على حال البلد اللى ضيعت من عمرها 5 سنين على الفاضى، وعشان كده قررت لا أجدد الرخصة من أساسه ولا أروح انتخب حد لبرلمان بقيت عارف للأسف أنه لا هايقدم ولا يأخر ولا هايعمل حاجة عشانى ولا ضد الأخ رئيس الوحدة.

Newspapers in Arabic

Newspapers from Egypt

© PressReader. All rights reserved.