أبوالكباتن!

Sout Al Omma - - اقتصاد - محمد الرفاعى

- تفوق مؤمن سليمان ببراعة، على أمينة رزق، فقد استطاع لوحده وبعون الله، أن ينتزع دموع أكثر من 70 ألف متفرج!

- من المؤتمر الصحفى، الذى عقد قبل المباراة بيوم، قال مؤمن سليمان بعنجهية وعناد غريب: النقاد هاجمونى عشان لعبت معروف يوسف باك شمال، طب أنا بقى هالعبه باك شمال!! طب الحمد لله إنك ما لعبتوش جون يا أبو الكباتن.

- النقاد والجماهير قبل المباراة: الزمالك يقدر، بعد المباراة: البطولة ضاعت فى جنوب أفريقيا.. ويا ولاد الحلال.. بطولة تايهة طول كده.. رجلها الشمال فيها خلخال زى ده!

- تم تجديد الثقة فى مؤمن سليمان، وجهازه الفنى، لحين ضياع بطولة الدورى.

- لو كنت من نادى الزمالك.. لأعطيت الشناوى مجانا للأهلى، وفوقه كمان.. كورتين هدية!

- لا عزاء لجماهير الزمالك العظيمة، ولا أراكم الله مكروها فى فريق لديكم!

- قررت حكومة، سيب سيب.. يا حبيبى وأنا أسيب، خفض الإنفاق فى جميع الوزارات والمصالح الحكومية، ووحدات الجهاز الإدارى للدولة، بنسبة 15 إلى 20% ، يا ريت بس تقولوا لنا التخفيض ده، على طريقة غاندى، ولا حسين سالم؟!

- هل تقوم الحكومة ببيع أسطول السيارات المخصص لكل وزير ومحافظ، فى مزاد علنى؟! وهل تقوم بالتخلص من ميليشيات المستشارين فى كل وزارة؟! ولا ده لا يجوز شرعا؟!

- تخفيض البعثات الدبلوماسية فى الخارج، بنسبة خمسين فى المائة، قرار حكيم لأنهم أكتر من الهم على القلب، وبيقبضوا بالدولار.. لا مؤاخذة.

- قام السيد محافظ الجيزة - حفظه الله ورعاه - بتفقد 18 مشروعا فى الواحات البحرية!! يا ريت بقى ينوبك ثواب، تخطف رجلك لحد العجوزة والدقى، لتفقد مشروعات الزبالة والقهاوى!

Newspapers in Arabic

Newspapers from Egypt

© PressReader. All rights reserved.