Ärch donäwe leewe Jong
Mon Dieu, wat hät sech ons OB en Pariss för ene dolle Deu aanjedonn! Met ons Kleen-Pariss hee aan de Düssel wor hä am stronze on hät denne Franzmänner op Französesch (o là là dat kann hä och!) usenangerklamüsert, wie sech ons Stadt am optakele es för de „Tour de France“2017. Hä selwer hät sech och lecker opjebrasselt, ene Tricolore-Schlips ömjebonge, domet sinne Verzäll „Bienvenue à Düsseldorf“charmanter eröwerkütt. Janz ohne Charme dojäje kütt hee en Kleen-Pariss sinne dolle Enfall eröwer, dat Schauspeelhuus afzorieße, weil et vill zo düer wör, dat Huus rongkeröm widder staats zo make. Em Rothuus kütt mr ussem Staune nit erus, wat dä Jong sech hät enfalle losse, ohne noh reihts odder lenks zo kicke. Selws sin SPD es am protesteere, de Opposizzijohn kann et nit jlöwe, dä ärme Intendant denkt draan, de Brocke zo schmieße, Nä, nu emol janz onger ons jesaht! Wenn et aan de Moppe fählt, moss mr sech dann de „Tour de France“aan et Been hänge? Künnt mr nit Sponsore söhke, die Penönzkes jähn locker make, domet sech ons Schauspeelhuus widder kicke losse kann? Siet Jan Wellem hät ons Kleen-Pariss en Tradizzijohn als Theater- on Konsstadt, on dat soll och so bliewe.
Monika Voss