蘇紹聰怕「毒親」

Metro Daily Hong Kong - - NEWS -

早前有政圈風聲,律政司司長袁國強搞掂「一地兩檢」之後就會交棒,其中律師會會長蘇紹聰係「大熱人選」喎!蘇會長噚日同一班小記聚會,自然被追問會唔會加入「熱廚房」啦!

會長話自己煮嘢食都唔叻,又唔鍾意煮飯,一陣煮錯咗仲會毒到自己 !所以廚房就算「熱」定「唔熱」都未必關自己事喎!佢又大讚袁司長做得好 !

律師會前會長Junius(何君堯)被揭發因其海外執業律師資格涉誤導,蘇會長又點睇先?

蘇會長就話,律師會的確收到市民投訴。至於一眾小記想知嘅詳情呢,會長就話「唔講得」,因為基於保密原則,只有投訴人同被投訴人知道結果喎。

咁覺唔覺得Junius 話係「手民之誤」先,蘇會長話唔評論,仲話自己同

Junius唔係好熟㗎咋!

嚟緊律師會就會搞個「青Teen 講場」活動,主題以「法、理、情」做主題,探討吓到底三者點樣可以取得平衡呢?

「青Teen 講場」受歡迎

到時喺10月14日就會搞個《基本法》訴訟知識講座,仲搵咗袁司長做主講嘉賓,晏晝仲會有模擬法庭嘅活動。

會長話依家名額已經爆滿㗎啦,所以頭痛要抽籤揀出學校,等到中四到中六生可以一嘗做律師既滋味呢!

(羅家晴攝)

蘇紹聰(中)同一班小記推介「青Teen 講場」活動。

Newspapers in Chinese (Traditional)

Newspapers from China

© PressReader. All rights reserved.