選美界愈來愈多喜訊,無論港姐、華姐一一排隊

Oriental Sunday Kiss - - Sunday Family -

做媽媽,2007年港姐冠軍張嘉兒去年緊接鍾嘉欣誕下BB女劉在心(Leora),就如嘉欣一樣,嘉兒變得母愛氾濫,復出工作不見一陣子就牽腸掛肚,有女萬事足。為甚麼生B湊B那麼辛苦,女士們仍要生呢?以前嘉兒不明白,現為人母後就明白了:「因為有BB個生活開心好多,佢一笑真係溶咗你個心,原來幾辛苦都係值得,生佢嗰陣幾痛都唔記得晒,B B實在太可愛。」

餵母乳的好處多多,嘉兒也希望全母乳餵哺,一誕B女即要求抱B埋身啜,經過最難捱的第一個月,嘉兒慢慢掌握餵奶技巧,至今堅持了九個月,並經常在網站分享餵奶貼士,協助同路媽咪。「好多媽咪擔心唔夠奶,驚B B唔夠營養,其實唔使擔心咁多,只要 BB多啲埋身刺激你腦部提供人奶,自自然就會多啲奶㗎喇!」

上次訪問嘉兒時約懷孕七月,她表示之後愈來愈行動不便,時常感到疲累,整個產期共重了約20磅。直至去年九月初,嘉兒順產誕下Leora,她憶起當時最怕陣痛那八小時,又嘔又腳震。「反而生嗰陣要用力push出嚟,釋放埋啲痛楚。陣痛先係最痛,嘔咗幾次,痛到捵床捵蓆腳都震晒,我家姐想影我相但我唔畀影,痛到冇心機,依家諗番如果佢有影,睇番都幾得意。」陣痛時嘉兒想過下次不會再順產,但見到Leora健康成長,幾痛都不怕了!「順產係值得嘅,對BB都好啲,例如BB經過陰道出嚟,令佢有好嘅細菌包住身體,冇咁易病同敏感。」

陣痛的十級痛教嘉兒難忘之外,坐月期間餵奶的辛酸也令她深刻,完全無覺好瞓。「佢兩個鐘頭食一次,食完就屙好多便便,可能佢食人奶消化得快。每晚嘅循環就係佢起身、換片、氹佢瞓,大約用一個鐘;到我瞓落床隔一陣佢又醒,佢真係逢1、3、5、7、9點都會準時起身!呢段時間真係幾辛苦,但捱過咗就愈來愈易喇。」

直到現在,嘉兒仍有一件心事未了。BB出生的一刻,她累到記憶「斷片」,失去了BB出世後首次餵奶的珍貴回憶,她很努力去回想,但至今仍然記不起。「一生完我即刻同醫生講擺BB埋我身餵奶,我記得BB成功啜過我,我仲記得老公剪臍帶、錫咗我一啖,但我已經冇咗BB啜我嘅畫面,唔知係咪我虛脫得滯……我好想記番起,好遺憾。」幸好老公當時有拍片,令嘉兒可以看回當時的情景,「片都冇我真係喊呀!男士們要記住細節講番畀老婆聽!」所以各位老公陪產時,一定要拍低每一刻,辛苦生完BB的老婆分分鐘會記憶「斷片」,要靠睇片回憶啊!

坐月期間嘉兒基本上跟足傳統,連洗頭她亦有意無意地跟從,因為湊B忙到無時間洗頭。「我都冇諗頭髮污唔污糟,根本忙到唔得閒諗,不過我有買洗頭粉令頭髮乾爽啲,開頭都有用薑水洗。」不過期間因為一些小小壞習慣,引致她視力出問題,要睇眼科。「我夜晚餵奶冇開燈,費事刺激BB瞓覺狀態,我一隻手抱住佢另一隻手咪玩電話囉,搞到對眼差晒。」嘉兒勸其他媽咪餵奶時要忍一忍,尤其不要黑暗中玩手機、玩iPad,有需要用手機就盡量把熒幕較暗一點。

Newspapers in Chinese (Traditional)

Newspapers from Hong Kong

© PressReader. All rights reserved.