愈大

愈怯場

Oriental Sunday More - - More / Cover Face -

JW的舞蹈細胞,其實比音樂細胞更早開發,年紀小小已習舞,「我學過好多種舞,最鍾意就係hip hop,動作bouncy又好chill。」去年她在九展的首個個人售票演唱會,便嘗試集合廿幾個舞蹈員一齊跳hip hop,今次她想挑戰solo dance,「想跳好jazzy好抒情的舞,可以配合我的慢歌。」有九展開騷經驗,紅館將會更事半功倍?

「絕對有幫助,學習點樣做一個個人演唱會,更加係一支強心針,畀我知道有人會買飛睇我唱歌,仲會跟住我一齊唱。」其實初出道的JW,已經有機會上舞台展示唱live功力,「七年前Leon幫我搞過音樂會,佢做司儀,我負責唱,唱完一首,謝幕,然後再唱,唔使同觀眾互動,已經覺得驚,做個人演唱會要獨力搞氣氛,更加驚。」

話說她小學六年級已踏台板,參加歌唱比賽,每年兩次,直至中學畢業,屈指一算,已超過十次,尚未計聯校表演做嘉賓、評判等等經驗,她應該算是舞台大師姐,不可能仍然怯場吧?

「的確,以前上台唱歌、講說話都唔會驚,但愈大愈怯,因為……唔知呢,可能愈大愈見識多,就愈發現自己渺小,說話要過濾才敢講,想得太多,好似唔係幾好,sometimes I just wanna be myself。」她說話愛中英夾雜,加上混血兒外貌,怯於在台上說話,是因為語言關係?「我中、小學都在香港讀,大學才去英國,緊張不關語言事。」人愈長大,愈怕失敗,就算失敗,也裝作平常,JW也有同感:「我會將軟弱收起,有唔開心,自己消化咗就算。」

Newspapers in Chinese (Traditional)

Newspapers from Hong Kong

© PressReader. All rights reserved.