Hear di Children’s cry
Every day di children dem jus a bawl out, Hear di children’s cry Blaine a talk bout. Di poor pickney dem full up a so much self-doubt An di moment dem try fi talk, yuh tell dem “shut up yuh mout!” Di children have a right to express An a right to happiness. Dem have a right to education fi achieve success, Mek wi treat dem wid respeck, dem life wi nuh fi moless, Cause a one life dem have, nuh mek dem live it wid regret. A full time wi put a stap to chile abuse, Mi tyad everyday fi jus a seet pon di news! A full time dem know a innocent life dem a kill, Wi really need fi jine wid Betty-Ann Blaine inna har priya vigil. As adults wi have a great responsibility, Fi proteck di children’s rights is our duty, Wi need fi treat dem wid fairness an no partiality, Cause equal rights an justice a fi every baddy, From di mada to di fada to di likkle baby!