Кочин
Өздерімен өз отандарының мәдениетін ала келген саяхатшылар мен қоныс аударушылар Кераланы астарлы мозаикаға айналдырды: Форт-кочин жағаларындағы қытайдың балық аулауға арналған керемет торлары, голландиялық өте әсем сарай мен XIV ғасырда қытайдың бірегей қыш тақташаларымен безендірілген, Маттанчеридегі ежелгі еврей синагогасы — бұлар біздің күндерімізге дейін сақталған бұрынғы заман жәдігерлерінің санаулысы ғана. Осы өлкеге келгендердің көпшілігі Оңтүстік-батыс Үндістанның ғажайып бай жерлерін өз бақылауларына алуға ұмтылғандары түсінікті жәйт…
Егер сіздер Кераладағы ең үлкен Кочин қаласына келсеңіздер, «51» өзгеше ресторанынан міндетті түрде «Бүгін ұсталған балық» тағамының дәмін татыңыздар, ресторан Маттанчериде, қаланың ең ескі көшелерінің бірі — Базар-роудта орналасқан. Оның ғимаратында бір кездері дәмдеуіштер қоймасы болған, онда дәмдеуіштерді сұрыптап, ыдыстарға жайғастырып отырған. Ресторанның бас аспазы өз тағамдары үшін ең жақсы, балғын теңіз өнімдерін тікелей өзі іріктейді. Мекеменің өзі бірегей Xandari Harbour отелінің аумағында орналасқан, оған тоқтасаңыздар, сіздер Форткочиннің тура жағасында тұрасыздар, ал бөлмеңіздің терезелерінің дәл тұсынан балық аулайтын керемет кемелер көрінеді. Содан бірнеше адым жерде базар бар, ол жерден сіздер дәмдеуіштердің түр-түрін сатып ала аласыздар.