Үстірт жонының сұлулығы

Каспий теңізінің жағалауынан Арал теңізінің жағалауына дейін орасан үлкен шөл-жартасты Үстірт жоны созылып жатыр. Бір кездері осы жер ерте замандағы Тетис мұхитының табаны болған. Сондықтан сіздер шөл даладан ежелгі замандағы балықтардың тасқа айналған сүйектерін, ұлу қабыршақтарын немесе, айталық, акуланың тісін тауып алсаңыздар, оған таңданбаңыздар. Нақ осы Маңғыстау өңірінде ұлутастар өндіреді, олар барлық құрылысқа түгелдей дерлік пайдаланылады.

Өлке табиғи сұлулықтарға бай, бірақ біз солардың бірнешеуіне ғана тоқталамыз. Ең алдымен, шар тәріздес конкрециялар алқабына барыңыздар, ол Ақтаудан солтүстікке қарай 100 километрге созылып жатыр. Мұнда түрлі көлемдегі: кішкентайларынан бастап адам бойына дейінгі жұмыр тастар көп. Олар судың көп ғасырлар бойғы әсерінен осындай болған деседі. Нағыз ертегідегідей көрініс.