Papanau karaja mogium kusai natagak pinotilombus
SANDAKAN: Papanau karaja mogium om manampasi pinotilombus kumaa songulun kusai ih masaon mimpoju rinulun umbak id Kuala Pemaguan, id sosodopon tadau Minggu.
Boyoon Papanau karaja Koupisan Bomba om Manampasi Malaysia (JBPM) Zon Sandakan Mohd Razali Awang Ahmad minoboros do nokotorimo o bogian dau do ruputan mantad Agensi Popogirotkuasa Maritim Malaysia (APMM) id jam 10.03 dongotuong do songuhun munggui kusai nolonod ontok pinapaharo do kaparagatan modtuongis om mimpoju id kawaigan Kuala Pemaguan.
Suminikap o bogian dau minoi id tampat kinantakan montok papanau karaja pomogihuman id posorili koiyonon dilo.
Minoboros isio do linimput panamangan JBPM nokotorimo noh ruputan papanau karaja mogium om manampasi tinimpuunan koniab.
“Nukaban noh PKOB id Pangkalan batu Putih Sandakan om papanau karaja mogium om manampasi nokotimpuun noh koniab miampai APMM,” ka dau.
Minoboros isio do munggui ih pinoruput do natagak nointutunan sabaagi Sharian Amirshah, 37.
Tumanud tapa munggui, Amirshah Yaakub, tanak kusai dau dilo luminabus minoi podtuongis miampai piipiro tambalut dau id disan daat Kuala Pemaguan.
“Munggui pinoboros do rinulun umbak tologod ontok masaon mimpoju id disan daat dilo,” ka dau mikuo alansan kopio tanak dau okito miampai natampasi.
Papanau karaja mogium om manampasi kakaal potilombuson di bogian bomba om APMM.