Agayo kounsikaan nakalabus ih momuruan takawas, ka di Mudi

Utusan Borneo (Sabah) - - Kadazandusun - Di HENRY BATING

KOTA KINABALU: Agayo kounsikaan tokou do nakalabus no ih momuruan takawas tokou mantad pinonguwungan do Tinan Monorina Pomunsaan Susuap Malaysia (SPRM) ih pinopokito po nogi do aiso kinogompitan disio id kaantakan pinongusutan.

Minoboros ih Timbang Prosidin KDM Malaysia, Tobpinai Mudi Dubing do potondulion tokou ngawi dara sontob nopurimanan taradaat mongoi do osonong nodi ngawi tumoguang do kobontolon monginsonong do koposion.

“Kinaantakan pinonguwungan dilo minanaak daton do iso sunduan pisompuruan om kounsikaan kopio kumaa kinaantakan diti tu minogowit dotokou kuminaa id iso sinompuruan angkab om pinggisaman,” ka di Mudi.

Tulun pinungaranan ‘Datuk’ dilo ponogi nga Timbang Porosidin do Parti Warisan Sabah (Warisan) om do naamot ih Mudi nopo nga Luguan Mongulud Warisan DUN Tulid, Pensiangan.

Kinopolobusan Timbang Porosiden Warisan dilo nopo nga tinorina di Majistret Cindy Mc Juce Balitus id Walai Pongusapan Tabaal Damai di pikiikiro jaam 9.45 kosuabon tadau kolimo, 13 Oktober.

Nokorikot ih Cindy id wad pongusapan di pikiikiro jaam 9.40 kosuabon miampai luminabus di pikiikiro jaam 9.50 kosuabon. Ontok jaam 1.10 talib tangadau, luminabus ih tulun kiumur 46 toun dilo mantad wad pongusapan montok minongoi rapou ginumuan tulun ih maso poingandad disio id natadon walai pongusapan.

Nasagaan do kuut papalabus tulun dino nokomoi miampai jominan kousinan RM50,000 om duwo tulun kinoiyonon.

Di ontok 5 Oktober, tinahan isio di SPRM montok manakadai pongusutan kinasalaan momoguno do RM1.5 bilion kousinan iso komontirian longkod poompus 2009 gisom 2015.

Ontok naamot pointahan, pinaatod isio pinosuang id walai pongusapan soira nokopuriman do au olidas.

Poompus pinongusutan dilo, noobian isio di sontinimungan luyar linuguan di Martin Tommy miampai nuhupan di Loretto J Padua, Norazmi Alimat, Cedric Choo om Jaikol Situn.

TAMBALUT ngawi poingandad kolobusan di Timbang Porosiden Warisan dilo mantad po di piipiro tadau.

PAGANAKAN poingamung minandad kolobusan di Timbang Porosiden Warisan dilo.

LANGAD mantad kinoruhangan taparagat manakadai tulun kampung.

MUDI DUBING

Newspapers in Malay

Newspapers from Malaysia

© PressReader. All rights reserved.