Kiharo 97 kg kulakub buu, duo kusai songkosuaian dinanda

Utusan Borneo (Sabah) - - Kadazandusun -

TAWAU: Kuut Sesyen Tawau hiti koniab pinaparatu do ukuman jiil apat toun om danda RM150,000 sompori-pori kumaa duo kusai tulun songkosuaian ih nokotumboyo kisala kiharo 97 kilogram kulakub om bogian ngawi tinan buu toiko ngaran ‘saintifik’ dilo Chelonia mydas.

Hakim Indra Ayub pinaparatu do ukuman dilo kuminaa di Adam Ilma, 30 om Gunak Sinduk, 20 ih dinawa minomosnoi do kasalaan dilo id Pulau Ligitan, Semporna ontok kotimpuunon wulan diti.

Goduo-duo diolo au nobian luyar, ponuhuan papanau do ukuman dilo tumimpuun tadau kinagakaman ontok 7 Oktober nakatalib om pomoruhangan ukuman jiil sontoun kagu sokiro ko au iyolo kaanu mambarai danda.

Ponuhuan nogi do kuut o goduo-duo diolo pootodon doid Koupisan Imigresen kalapas asalasai papanau do ukuman jiil.

Tumanud panandasan, iyolo goduo-duo dinawa kiharo 97 kg kulakub om bogian ngawi tinan buu, ilo nopo nga tayam ih tingoligon ih pinosurat id Bogian 1, Timpu 1, Numbur 8 Enakmen Pomogompian Tayam Lalang 1997, ontok 11 kosuabon Oko nakatalib.

Dinawa iyolo id suriba Seksyen 41 (1) Enakmen Pomogompian Tayam lalang 1997 om obuli ukumon id suriba Seksyen 41(4) Enakmen ih iso’i om binasa songowian Seksyen 34 Kanun Koinggoritan.

Ontok ‘prosiding’ koniab, kuut nouhung wongi owutong do naamot soira karung kisuang kulakub buu om bogian ngawi tinan buu nukaban montok kopongintutunan.

Upisor Mangadawa Koupisan Tayam Lalang (JHL) Abdul Karim Dakog ih minonorina do pangadawaan nogi minomisunud kuut do goduo-duo natandasan pinapadagang onom tinan buu miampai gatang RM600.

Tumanud kopoilaan kes, Adam om Gunak tinaan di sontimungan popogirotkuasa JHL ih pinapanau do karaja mongipop koimaan taraat kikompitan buu, kalapas nokoilo diolo kiharo kulakub om bogian tinan suai buu miampai aiso surat kasagaan mantad montiri toiko mononontuduk potunud.Bernama

Newspapers in Malay

Newspapers from Malaysia

© PressReader. All rights reserved.