Ponuu’an kumuung id Esszone pinotihombus gisom 29 Okt.

Utusan Borneo (Sabah) - - Kadazandusun -

KOTA KINABALU: Ponuu’an kumuung id boogizan kavaigan tuu uvang poinsuvang Zon Oumohig Kohisa’on Sabah (Esszone) ih nopupusan baino (koniab) potihombuson gisom 29 Oktober diti, pogiotonkuasa suvab (baino) mantad jam 6 sosodopon gisom jam 6 kosuvabon.

Pesuruhjaya Polis Sabah Datuk Ramli Din minoboos do ponuu’an kumuung dino nokomoi kopoompit do boogizan kavaigan uvang Tawau, Semporna, Kunak, Lahad Datu, Kinabatangan, Sandakan om Beluran.

“Miampai kogiotkuasa o ponuu’an diti, tuhun togumu ih poingizon id boogizan dino nokomoi pokionuon kivaa id suvang daamin (om tuhun suvai au pakavasaon sumuvang toi kivaa) id boogizan di nokoimagon no ontok timpu di pinoboos,” ka disido id suang kopoihaan doiti koniab.

Minoboos isido do haang popotihombus do ponuu’an kumuung dino nokomoi nopo nga montok papatantu do boogizan kavaigan dino au osuvang di tuhun talaat di obuli mongundoonok koumohigan mononoizuk sompomogunan om tutumombuhui ih humikot doid pulou ngavi podtuongisan id boogizan dino.

Minoboos zi Ramli do tumanud do kopoihaan ih notoimo, tinimungan mantad kaabatan Filipina ih papanau do kapaagatan panazangan montok kapaganu do usin pokihapusan om tinimungan Abu Sayyaf kakaal kuminam sumuvang do kavaigan Esszone montok manazak om monoodo do koimaan talaan mozo pivohitan ih suvai.

Ka disido suvai montok mamajamin koumohigan om kohumaagan layat id Sabah, ponuu’an kumuung dino nokomoi nogi papasanang dati do kopogiotankuasa om pongintongan kumaa kapaapanaan om kopongimbuhai do tivou oumohig nokomoi do mongindapu ‘chalet’ om monginsada maza koikotan puu koumohigan.

Tumanud disido, popoinsiibo nogi o boogizan dau do kuasa kumaa saavi-avi Huguan Pulis Uvang id boogizan ponuu’an kumuung dino nokomoi montok papahabus do poomit kumaa nombo-nombo mokianu montok tuduvan kapaagatan ponginsadaan om vazaan ih kopokionu kozo. -Bernama

Newspapers in Malay

Newspapers from Malaysia

© PressReader. All rights reserved.