Walu kes papataam tanak

# Pinorikud posorili longkod pogun mantad podi toun nakatalib

Utusan Borneo (Sabah) - - Kadazandusun -

KOTA KINABALU: Walu kes papataam tanak pinorikud di bogian pulis id posorili kakadaian tagayo idsuang timpu duo toun mantad podi 2016.

Boyoo Pulis Watas Kota Kinabalu Asisten Komisioner M Chandra minoboros do limo mantad kes pinorikud ontok 10 wulan koiso mantad podi wulan (Januari) toun diti.

“Gisom baino diti nakapanaan tokou tolu suspek tondu kiumur 18 toun gisom 22 toun kaamung songulun kusai ih nogi tambalut kusai songulun mantad suspek ih tinaan.

“Koinsanai suspek soriukon tumanud Seksyen 318 Kanun Koinggoritan,” ka dau id pitimbungakan abar kopinamot Pinitimungan Wulanan Longkod Upis Pulis Watas (IPD) Kota Kinabalu koniab.

Minoboros Chandra do kinalantaian pinanahanan dilo nakaanu minomonsoi kalapas nokotorimo o bogian dau do ruputan kinokitonan tanak/baragang di songulun pakaraja am id iso longkod pomolian barang ngawi hiti di ontok 29 September nakatalib.

“Asil pinonoriukan nakaanu minogium songulun suspek tondu ih nokotumboyo minangakan tubat (pil) montok papatatak baragang ih bino miampai koluyungan.

“Suspek kalapas dilo pinoposuang do baragang (janin) dilo id suang polositik pogului pinapataam baragaang dilo id tong sampa id longkod pomolian barangan ngawi dilo,” ka dau.

Tumanud dau ilo nopo nga iso mantad kes ih noilaan hiti mantad piipiro kes suai kaamung kes pamataaman tanak ih tinongkiadan id disan gerai om susuai poh.

Namot dilo pinosorou nogi di Chandra o tulun togumu doulu noh tinimungan nokolohing montok au otombirangan miampai tinan di minsisiliu sabaagi bobolian (bomoh) om kitujuan mogowit mogidu harata kakamot.

“Gisom wulan (September) toun diti nokoporikud tokou noh do kiginumu RM300,000 kinorugian kopoompit do tulun nokolohing.

“Kes kawawagu kopoompit do songulun molohing tondu ih nokito di tolu tulun kusai tulun China ih nointutunan sabaagi Dr. Goh di Jalan Gaya minoboros do munggui haro nasib au osonong songowian monongodu dau.

“Montok papatagak do nasib taraat dilo, sinuhu di suspek o munggui montok maganu toinsanan barangan kigatang kaamung barang amas om tusin montok poopion idsuang polositik pogului pahakaon kumaa suspek.

“Suspek kalapas dilo papawaliu do barangan dilo doid iso kagu polositik pogului alanan miampai barangan suai kaamung bawang om karatas kiwarana osilou om monuhu munggui montok mongukab dino idsuang timpu piipiro wulan,” ka dau.

Minoboros Chandra do poompus timpu dilo tumagak ih suspek dino kaamung guminuli doid pogun natadon montok mongilag mantad oilaan do kokuasaan pulis.

Idsuang ahal dilo minoboros isio do ‘indeks jenayah’ id Kota Kinabalu maidlaid sumiriba doulu noh kopoompit do kes manakau padsakaian ih nokoingkudi do kiginumu 13 paratus kapaamung 34 kes.

Pokionuon nogi disio o tulun togumu montok manahak do nunu noopo kopoilaan id bogian sompori-pori montok laang kopomunsaan tosisikap.

CHANDRA minomorisa nuludan tamangan tapantang ontok Pinitimungan Wulanan IPD Kota Kinabalu koniab.

Newspapers in Malay

Newspapers from Malaysia

© PressReader. All rights reserved.