Minggu PPIBKAL pinopointalang sinindak susumikul moboros id mogisusuai boros

Utusan Borneo (Sabah) - - Kadazandusun - Di HENRY BATING

LABUAN: Pinointutun oh Longkod Ponginabasan Toilaan om Boros (PPIB) Universiti Malaysia Sabah (UMS) montok manaak kounalan kumaa susumikul ngawi universiti dilo minsingilo mogisusuai boros om nogi mokiinobos papawakas koimaan pirotian sabaagi tulun Malaysia.

Pinopointalang ih Kumoduwo Potunud UMS Kampus Sompomogunan Labuan (UMSKAL), Prof. Madya Dr Geoffrey Harvey Tanakinjal do PPIB nopo nga isoiso no longkod miagal dilo id pialatan toinsanan universiti id Malaysia.

“Mantad diti agayo kalansanan kumaa toinsanan susumikul do kaanu daa papalaab kabaalan id boros sompomogunan om kinoiyonon montok mongukab kobontolon sumuang id karaja mogisusuai kaganaan,” ka disio.

Nokointalang di Geoffrey ilo di ontok panaak pason kinopoimaganan do Minggu PPIBKAL nakapanau id kampus universiti dilo hiti di Tadau Kolimo nakatalib.

Poingampai nogi potindapou do ontok dilo ih penyelaras PPIBKAL, Dr Romzi Ationg om mongingia ngawi longkod nokomoi.

Mogisusuai ababayan nakapanau poompus sominggu kapaampai do pokitanan, piboian, kopolombusan moboros id mogisusuai boros om nogi kinaparangahan moboros do mogisusuai boros mantad pialatan susumikul ngawi.

Kinaparangahan mogihahampot mogisusuhut moboros dilo nopo nga nakapaampai boros Inggilis, Mandarin, Arab om nogi Kadazandusun.

Pinupusan oh ababayan sominggu dilo miampai kinopokitanan do mogisusuai nansakan do mogisusuai tinaru.

SUSUMIKUL ngawi maso mogihahampot poporongou mogisusuai boros.

WOOKON nokolimbou pialaan id mogisusuai ababayan minokigambar miampai somboogian mongingia.

GEOFFREY maso mongumbal takanon pinokito ontok pinomupusan Minggu PPIBKAL.

Newspapers in Malay

Newspapers from Malaysia

© PressReader. All rights reserved.