Kuminam sumuang miampai aiso kasagaan, 18 tulun Filipina tinaan PPM Sandakan

SANDAKAN: Kiginumu 18 tulun Filipina ih sumuang daa pogun diti miampai aiso kasagaan tinaan di Tinimungan Pulis Marin (PPM) Sandakan id duwo operasi misusuai hiti.

Komander PPM Wilayah 4 Sabah Asisten Komisioner Mohd Yazib Abd Aziz minoboros do koinsanai ‘migran’ tinaan ontok pinapanau karaja ‘Ops Pensura Khas’ id sosodopon om sodop Minggu.

Id pinonugkuan kiikira jam 11.50 dongotuong, kiginumu 11 tulun kusai om songulun tondu kikotumbayaan ‘migran’ songkosuaian tinaan ontok masaon poingodop id liwang tombului id kakampungan setinggan sawat waig, Batu 2 hiti.

Minoboros isio do koinsnai suspek kiumur pialatan 21 gisom 47 toun ih ponogi tulun Filipina kikotumbayaan do wagu poh korikot id watas diti om aiso nunuunu katarangan tinan.

“Ontok pinonugkuan pinapanau okitonan piipiro tulun ih maamaso poirikau id liwang baranda lamin nakaanu minogidu soira nokoilo kinorikotan pulis.

“Tinimungan monunugku kalapas dilo pinopointutun do tinan sabaagi pulis om suminuang lamin dilo, nokoilo do kiginumu 11 kusai nosukod om songulun tondu nosukod kikotumbayaan ‘migran’ masaon koodop id liwang tombului,” ka dau.

Minoboros isio do asil pinomorisaan, toinsanan ‘migran’ noilaan aiso nunuunu katarangan tinan om kikotumbayaan do ‘migran’ ih wagu poh kotindal mantad pogun doros Filipina om pinoposiliu do lamin dilo sabaagi pongumbayaan naamot.

Ka dau pinomorisaan potilombus nogi nokokito do 11 beg pakaian ‘migran’ dilo, om koinsanai migran tinaan sabap kikotumbayaan do nokoompit kes kopomilutan ‘migran’.

“Pinonoriukan timpuuni kumaa toinsanan ‘migran’ ih nagakom pinopointarang do koinsanai diolo suminakai kapal kumpit mantad Zamboanga, Filipina, magandad o migran do bot tosiau ih mogowit diolo sumuang Sandakan,” ka dau.

Namot id operasi iso’i id jam 2.30 sosodopon, nakapaaan o bogian dau do onom tondu tulun Filipina kiumur 20 gisom 33 toun id bogian kawaigan daat Tinosa Batu 7, hiti.

Ontok operasi dilo, Unit Risikan Marin miampai kagarasan apat puru PPM Sandakan minomogusa iso bot osiau ih mosi-rosi pakaayan doid Bawang Tinosa 1, Batu 7.

“Ontok ginusa, bot tosiau dilo suminuang Sungai Baru, Batu 7 hinonggo ilo natagak kapadtamangan om nantaban id bogian bakau disan bawang dilo. Tekong minaganu laang miampai tuminuhun mantad bot tosiau om minogidu doid suang talun bakau om au nakanu minogium,” ka dau.

Minoboros Yazib do bot tosiau dilo nakaanu minanaan om asil pinomorisaan kiharo susumakai kiginumu onom tondu nosukod kikotumbayaan mantad pogun doros Filipina.

Minoboros isio do pinomorisaan potilombus nokoilo do tolu susumakai aiso pongintutunan tinan di totopot om tolu kagu haro pasport Filipina kosong om aiso cop kinosuangon mantad Koupisan Imigresen.

“Pinonoriukan koinsanai susumakai pinapatarang do toinsanan diolo suminakai bot tempel mantad Isabella, Basilan Filipina pakaayan id kawaigan piwolitan Filipina-Malaysia, kalapas dilo magandad bot tosiau ih mogowit diolo sumuang Sandakan,” ka dau.

Tumanud Yazib montok goduwoduwo kes dilo, koinsanai migran au minambarai nunuunu pambaraian toiko tambang poompus pindalanan diolo. Asil pinonoriukan timpuuni nogi nokoilo do koinsanai migran jinanjian pakarajaan id Sabah.

Minoboros isio do toinsanan migran nowit om taanon id Markas Operasi PPM Sandakan montok laang potilombus, om soriukon tumanud Seksyen 6 (1)(c) Akta Imigresen 1959/63.