Ralan Terowong Sepanggar baino nukaban

Utusan Borneo (Sabah) - - Kadazandusun -

KOTA KINABALU: Ralan terowong talun alun miapid koiso kisinodu 600 meter hiti popiromut do Universiti Teknologi Mara (UiTM) om Lolokiton Sepanggar baino nukaban.

Boyoon Montiri Tan Sri Musa Haji Aman minoboros do pinongukaban terowong dilo tantu noh do popoinggumu kagu kaparagatan ekonomi id pogun diti doulu noh idsuang bogian pamansaian, pongilangan, kotorinaan logistik om sokodung kumaa papanau karaja ‘eksport’ om ‘import’.

“Terowong Sepanggar ih popiromut nogi do bogian Taman Pomorunan Kota Kinabalu (KKIP) om Lolokiton Kontena Sepanggar diti kaanu poposiliu do KKIP om lolokiton diti lobi koponokialit.

“Kounalan diti tantu noh do kaanu poponiba kagu piwolitan toiko kosoduo pindalanan kapangatadan barangan kumaa id Lolokiton Sepanggar om nogi kaanu poposikap do papanau karaja om kapapanaan kontena katanud palan popoinggayo do lolokiton diti,” ka dau id pinonimpuunan pinongukaban Terowong Sepanggar Kota Kinabalu, hiti koniab.

Teks pason dau binasa di Kumoduo Boyoon Montiri Tan Sri Joseph Pairin Kitingan.

Minoboros ih Musa do baino bogian Pomorunan Tokoodo om Osuhatanan (PKS) nogi kamampu monorini timpu om kos pindalanan om nogi papaharo do koposorilianan ekonomi ih lobi ogirot.

Ka dau koporintaan pogun toririmo maganu kawagatan koinggumuon kotundaan id bogian Sepanggar.

“Masaon tokou papawakas karaja miampai mongunsub kapaapuan doid watas diti sabap korikohonon dino ih kangaam kopio om posorili di kangaam montok kotundaan pomorunan tawagat.

“Otumbayaan oku do ‘infrastruktur’ diti kopoingkawas doti do kosunion ‘sosio ekonomi’ kinoiyonon miampai pinongukaban watas wagu id posorili dilo,” ka dau.

Tumanud dau masaon Sepanggar kotoguang kopoindalanan monginwagu ih tantu noh momoguno do kounalan infrastruktur talun alun di ‘efisien’ montok momogonop kinatambaan trafik id watas dilo.

Kakaal ogumu abaabayan montok tujuan popoingkawas ralan maan pouhano montok monokodung kotundaan id watas Sepanggar.

“Koporintaan pogun om Pisompuruan tumilombus misokodung montok monginsonong om popoingkawas kagu kawakasan infrastruktur popoingkawas kagu kawakasan infrastruktur piturubungan id pointongkop pogun.

“Poinggoyoon tokou doti o ralan Universiti Malaysia Sabah-Sulaman montok momogonop kinatamaan trafik maya do kopongobian mantad koporintaan Pisompuruan,” ka dau.

Nokotindapou nogi id abaabayan dilo nga Montiri Kotundaan Rayat om Ahal Momoguno Datuk Jainab Ahmad Ayid, Montiri Ponombuluian, Koubasanan oom Montiri Karaja-Karaja Poimbida Datuk Seri Panglima Teo Chee Kang.

PAIRIN (apat gibang) pinotimpuun do abaabayan dilo mikuo intongan di Teo (gibang), Masidi (duo gibang), Jainab (tolu wanan) om tombului tapantang suai.

Newspapers in Malay

Newspapers from Malaysia

© PressReader. All rights reserved.