Sarawak napi penanggul kelalu mayuh pengereja pengawa luar

BETONG: Sarawak napi penanggul kelalu mayuh pengereja pengawa ari menua luar iya nya urung 150,000 ke gawa ba sektor kebun dandang besai, kilang enggau pengawa berumah.

Sapit Kepala Menteri Datuk Amar Douglas Uggah Embas madah, berindik ari pengereja pengawa ari menua luar ti kelalu mayuh ngujungka kitai kurang pengereja pengawa jelan pengelandik enggau landik ari bala nembiak di nengeri tu.

“Menua kitai udah maju pia mega Sarawak mayuh industri ke udah dikemansang di Bintulu enggau Kuching baka pemansang Koridor Kuasa Dikena Baru Sarawak (SCORE) ngujungka penyampau orang ti minta kereja betambah.

“Tang pekara ke ngenyinu ditemu aku naka diatu, urung 150,000 pengereja pengawa kitai di Sarawak endang orang ari menua luar...69,000 gawa ba kebun dandang besai (kepala sawit), 33,000 ba sektor kilang enggau 26,000 ba sektor pengawa berumah,” ku iya.

Iya madah munyi nya lebuh nutup Program Transformasyen Vokasional Nembiak (MYTV) ba Padang Futsal, Spaoh ditu ensanus.

Uggah ke mega Menteri Betaam Betupi Moden, Tanah Adat enggau Pemansang Kandang Menua madah atur ke engkeman patut digiga laban Sarawak kelalu mayuh pengereja pengawa ari luar, mayuh nembiak lepas Sijil Pelajaran Malaysia ( SPM) enggau Sijil Tinggi Persekolahan Malaysia (STPM) lebih agi ba menua pesisir ke bedau bulih pengawa.

Beratika penanggul nya, ku iya perintah nengeri patut bejalaika sekeda atur ke patut dikena meri peransang sereta meri latih ngagai raban nembiak ba menua pesisir dalam bidang teknikal.

“Endang udah nyadi polisi perintah Barisan Nasional (BN) iya nya nentuka genap rayat menua tu lebih agi bala nembiak dibantu.

“Program MYTV enggau Palan Transformasyen Mindah Kin Kitu (Mobile CTC) entara atur dipejalaika perintah nengah ejensi bekaul meri latih ungkup bala nembiak lepas SPM enggau STPM ke bedau bulih pengawa lebih agi ba menua pesisir,” ku iya.

Berindik ari nya, iya ngarap peluang nya ulih dikena bala nembiak ke empai bulih pengawa ba menua pesisir lalu ngarap pengudah nyereta latih pengelandik pengelama dua minggu nya sida deka bulih pengawa ke manah.

Ku iya, pesereta ulih milih sekalika deka nampung pelajar bidang teknikal ba kolej komuniti sereta vokasional dikena ngenegapka agi pengelandik sida.

“Kita (pesereta) mega ulih ngepunka pengawa dagang baka nengah bidang kulinari, pemajik gamal, nguntin buk enggau betukang,” ku iya.

Nangkan nya, Panglima Medan Timur Tentera Darat, Leftenan Jeneral Dato’ Wira Mohd Zaki Mokhtar madah juluk MYTV iya nya meri latih pengelandik enggau vokasional ngagai nembiak ba menua pesisir baka ari Spaoh laban menua nya chukup jauh.

“Serak tu, program nya bisi digulu 126 pelatih ke belajar dalam lapan bidang iya nya tukang kayu, nusun batu bata, nyambung elektrik, tukang paip, kulinari, pemajik gamal, nguntin buk enggau betanda.

“Nengah program tu bala nembiak dikearap ulih nyungkak penatai pemisi diri empu dudi hari,” ku iya.

Iya madah sekumbang dipejalai kenyau ari taun 2015, bisi 991 nembiak udah dilatih dalam mayuh pengelandik.

Nitih rikod, ku iya bisi 20 iku ari bansa Penan udah nampung pelajar ngagai Kolej CENTEX Santubong lalu 23 pesereta ari Dalat enggau Baram benung nampung pelajar ba Akademi Binaan Malaysia (ABM).

Nangkan nya, 22 iku nembiak ari Murum enggau Nyalau mega nampung pelajar ba Kolej CENTEX enggau ba Opis Indu enggau Ruang Bilik Sarawak.

“Program tu meri peluang ngagai bala pesereta ngambi bagi ba projek bekaul enggau rayat mayuh lalu naka tu bisi lapan projek udah dipejalai.

“Projek tu nyengkaum ngaduka Tadika di Murum, Balai Raya di Kampung Nyalau, Bintulu, Balai raya Kampung Taman, Dalat, Pasar Tamu di Baram enggau begunan Mayuh Guna Nembiak ba Belawai,” ku iya.