Anang nangi ngaga ripot polis ba kes beleman mali
Bepelasarka undang-undang baru dia orang ti nemu pasal kes tang enggai madah sida ulih kena ukum
KUCHING: Bepelasarka undang-undang baru perintah Malaysia ba Genteran Tusun Ukum 792, ’Sexual Offences against Children, Act 2017’ baruh Seksyen 19 madahka orang ke nemu pasal penanggul ke nyadi ba anak mit nya, tang enda ngeripot penanggul nya, tau sama kena ukum.
Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit (KKKWKPK) Dato Sri Fatimah Abdullah madah ba Bagi VII baruh ‘Miscellaneous’ orang ke enda ngeripot bisi penyalah ke nyadi ba anak mit tau sama di ukum.
“Dalam genteran tusun ukum nya madah enti nyema orang ke nemu pasal kes enda ngeripot penyalah ke nyadi ba diri sebilik tauka anak mit nya, dia sida ke enda ngeripot kes nya tau sama kena ukum enda lebih ari RM5,000,” ku Fatimah.
Iya madah munyi nya ba aum media pengudah abis aum Opis Kunsil Orang Indu enggau Diri Sebilik (MWPKS) begulai enggau ijinsi perintah sereta NGO di sebengkah hotel ditu, kemari.
Ku iya, ambika chunto nengah undang-undang baru tu nyema enti bisi pengawa salah, baka beleman mali tauka pasung nyadi ba ruang bilik nya, digaga laki indu nya, tang bini iya enda ngaga ripot, reti nya bini iya pan tau kena ukum RM5,000.
“Kekadang indai orang enda ngeripot penusah ke nyadi ba ruang bilik iya empu laban berati orang ti ngereja pengawa salah nya laki iya. Sida nangi laban laki nya ke nupi sida sebilik, enti laki iya masuk jil, sapa ke deka nupi sida menyanak?
“Kadang- kadang nya runding indai orang, tang sida iya enda nemu ke nanggung pemerinsa nya anak diri, naka ni anak iya ulih beretan?,” tanya Fatimah.
Nitihka indeks pengawa salah ke dirikod Polis Diraja Malaysia ( PDRM), ‘ Kaul Saspek enggau orang dituntung Kes Beleman Mali Kontinjen Sarawak’ ke taun 2017 (1 Jan ngagai 6 Sept 2017), baruh kategori apai kandung (8 iti kes), apai tiri (2 iti kes), aki (3 iti kes), diri
Dalam genteran tusun ukum nya madah enti nyema orang ke nemu pasal kes enda ngeripot penyalah ke nyadi ba diri sebilik tauka anak mit nya, dia sida ke enda ngeripot kes nya tau sama kena ukum enda lebih ari RM5,000. Dato Sri Fatimah Abdullah Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit
menyadi (2 iti kes) enggau aya (4 iti kes) dibanding enggau taun 2016, apai kandung (3 iti kes), apai tiri (3 iti kes), aki (siti kes), diri menyadi (siti kes), aya (4 iti kes) enggau ipar (siti kes).
Lalu nitihka statistik kes orang ti dituntung penusah beleman mali dalam pengawa salah indeks taun 2017 Kon- tinjen Sarawak, pemayuh kes ke dirikod di Sarawak, Kuching (2), Padawan (2), Sibu (1), Bintulu (1), Sarikei (2), Saratok (2), Kapit (1), Limbang (1), Betong (1), Serian (1) enggau Marudi (1).
Lalu nitihka pechah baansa ke taun 2017 naka kediatu, Melayu (5), China (1), bansa bukai (8).