Ngambi bidang bekaul digital deka diberi skolarsip
Ba bidang baru nyengkaum ngagai palan pelajar tinggi di menua tasik ti bisi bekaul enggau digital
KUCHING: Perintah nengeri besedia deka nyendiaka skolarsip ngagai nembiak nengeri tu ke deka nampung pelajar dalam bidang baru ke ulih mai pemansang ngagai Sarawak.
Kepala Menteri, Datuk Patinggi Abang Johari Tun Openg madah, perintah sedia nganjung nembiak nengeri tu nampung pelajar nyengkaum ngagai palan pelajar tinggi di menua tasik, ngulihka penemu ke ulih ngemajuka nengeri tu jemah ila baka bekaul enggau digital.
Iya madahka kelimpah ari palan pelajar tinggi di menua tu, mayuh univerisiti tebilang di menua tasik baka Stanford, MIT (Massachusetts Institute of Technology) sereta ke bukai ti bisi nyendiaka bidang tauka kus ke ulih mai pemansang ngagai menua.
“Perintah Sarawak amat ngemeratka bidang ti ulih mai pemansang ngagai nengeri tu jemah ila.
“Nya alai aku bisi udah minta ‘academic world’ nyendiaka kitai input tauka meri langgur penemu,ari nya kitai ulih meri skolarsip enggau duit jali ungkup bidang baru tu.
“Tu peluang Sarawak, laban kitai ngasaika kitai enda tau enda ngangkatka pengelandik peranak Sarawak ngambika lebih maju, lalu Sarawak enti deka maju nadai pilih bukai tang nuju digital.
Abang Johari mansutka pekara nya lebuh bejaku seraya bejadika International UNIMAS STEM Engineering Conference (EnCon) 2017 ke diatur Fakuliti Kejuruteraan Universiti Malaysia Sarawak (UNIMAS) ba sebuah hotel ditu, kemari.
“(Nyema bisi bidang baru sereta bisi nembiak ke patut) Kitai deka ngiga duit dikena melanja sida lalu udah nya kitai nganjung sida bejalaika pemansik enggau pemansang (R&D), “ku iya.
Berindik ari pekara nya ku iya, lapan bulan ke udah enggau bantu kaban akademik, pengawa ngangkatka infrastruktur internet chakah dipejalaika lalu perintah nengeri ngungkupka belanja dikena nambahka peneras arus internet di nengeri tu.
Abang Johari lebuh dipinta meri penerang silik bekaul enggau pekara nya, madahka pekara nya deka dipenyadika enda lama agi.
“Pekara tu deka dipadahka nengah sebengkah pengerami enda lama agi. Ukai semina nampung pelajar ba MIT aja tang enda ngira institusyen lalu kitai deka nyendiaka skolarsip,” ku iya nandu baru lebuh dikerandau raban pengarang berita.
Kelimpah ari nya lebuh dikerandau bekaul enggau pekara bukai ti dikerembaika nengah media rama iya nya, isu Rohingya, Abang Johari madahka diri enggai maruk diri pasal pekara nya.
Perintah Sarawak amat ngemeratka bidang ti ulih mai pemansang ngagai nengeri tu jemah ila. Datuk Patinggi Abang Johari Tun Openg Kepala Menteri Sarawak