Taja betapi pemar tang juluk nganjung bantu pemakai tetap dipajak

Utusan Borneo (Sarawak) - - Berita Iban -

MIRI: Taja sebuah ari kerita 4WD ari ‘Baram Offroader’ ke beraban nganjung bantu barang pemakai ngagai Long Aton, Tinjar Baram rusak pam ai, tang nya enda nekul sepuluh iku raban nya ngenataika diri ba endur ke deka dituju.

Chairman Baram Offroader, Hazelan Abdullah madahka raban nya nguna lima buah kerita sereta suah ngetu semanjai jalai kompeni kayu batang, ke alai siku deriba meda ai tepanchit ari anggat ‘radiator’, ti ngujungka sida ngetu nganti nya chelap dulu sebedau nampung pejalai baru.

“Kami suah ngetu laban sebuah ari kerita nya rusak pam ai, nganti radiator udah chelap baru kami mupok baru. Tang nya enda nanggul kami ngenataika diri ngagai palan ke dituju ti deka nganjugn barang bantu ngagai peranak ke udah tasah angus,” ku Hazelan madah ngagai pengarang berita The Borneo Post bedau lama udah.

Rumah panjai Long Aton ke panjai 22 pintu udah dituntung penusah angus pun bulan tu tadi.

Ku Hazelan, raban nya bekejang ari Miri ke Long Aton kena 9 September, ti nguna beberapa jam nengah jalai kompeni kayu batang.

Ku iya, pejalai suku keterubah lanchar nyentuk ke renggat kedua kerita sida bisi penanggul ketegal rusak pam ai.

Ku Hazelan, raban nya bisi mai beras, barang pemakai, enggau gari dikena mantu sida ke tasah nya.

Tu mih ke dikumbai gawa begempung ba bala pesereta ketegal pengeran deka mantu sida ke tasah.

“Kami berasai lantang ati lebuh ngenataika diri ba endur ke dituju disambung Tuai Rumah enggau peranak rumah panjai nya enggau ati ke tebuka,” ku iya.

Ku Hazelan, raban nya bemalam di Long Aton sereta ngasaika gaya pengidup enggau pemakai di rumah panjai sebedau mulaika diri ke Miri hari siti.

Tu sebagi aari tannggungpengawa rama mantu orang ke tusah enggau peranak menua nya maya dituntung penusah ngenyit baka angus nya, ku iya.

NGANJUNG BANTU: Tim Baram Offroader betuaika Hazelan (empat kanan) lebuh ke datai ba Long Aton munggah barang bantu ke dianjung ngagai peranak rumah panjai nya ke tasah angus.

Newspapers in Malay

Newspapers from Malaysia

© PressReader. All rights reserved.