Chong agi ngenanka sitak Parlimen Bandar Kuching maya PRU14

Utusan Borneo (Sarawak) - - Berita Iban -

KUCHING: Chairman DAP Sarawak Chong Chieng Jen (gambar) madah diri deka bediri ngenanka penuduk Parlimen Bandar Kuching ba Pengawa Bepilih Besai (PRU14) ti deka datai.

“Ya, aku deka bediri minta pilih sekali agi ba PRU14. Rintai nama chalun ngarika DAP ke bukai deka dipadah ba maya bukai,” ku iya.

Chong mansutka jaku nya lebuh dikerandau ba aum pengarang berita di Indu Opis DAP ditu, ensana.

Dulu agi ari nya Chong ngutuk pemutus Perintah Besai nguna duit taruh menua penyampau RM10 bilion diperanak ba Amerika.

Iya madah ba maya ekonomi ke enda manah diatu, peranak Malaysia patut enda diperinsa balat agi.

“Pengawa Menteri Besai Datuk Seri Najib Tun Razak nguna duit taruh menua, diperanak ba Amerika ketegal deka nyaup ngenegap ekonomi Amerika seiti pengawa ke enda ngena,” ku iya.

Ngenang kaul ke sama, Chong ke mega MP Bandar Kuching enggau ADUN Kota Sentosa ngenataika tanya sekalika pemutus nya dikena nutup tasat Department of Justice (DOJ) sentang skandal 1MDB.

Iya pechaya Barisan Nasional (BN) nguna duit KWSP nutup skandal nya.

“Berindik enggau nya, kitai meseti ngubah perintah ba Pengawa Bepilih Besai (PRU14) ti deka datai,” ku iya nandu.

Ba penemuai kerja Najib betemu enggau Presiden Amerika Donald Trump kena 11 September tu tadi, Malaysia netapka pemutus deka beranakka puku penyampau US$ 3 bilion di Amerika kelimpah meli bilun Boieng komersial.

Ngenang kaul bukai, Chong netapka Pakatan Harapan (PH) deka berengkah ngadu licha di serata menua minggu tu.

Ku iya, licha ke bela digulu raban ketuai politik ari Amanah enggau PKR nya dikena nyadung penerang ngagai rayat sentang pekara ke nyadi di menua tu.

Bela datai ba aum pengarang berita ADUN Pending Violet Yong.

Newspapers in Malay

Newspapers from Malaysia

© PressReader. All rights reserved.