Anang enda besaup ngangkatka penyulut akademik, kokurikulum

PIBG patut besaup enggau piak sekula meransang nembiak nyapai penyulut nyentuk ngagai tikas pelajar tinggi: Dr Rayong

Utusan Borneo (Sarawak) - - Berita Iban -

ENGKILILI: Kaban Kunsil Nengeri (ADUN) Engkilili Dr Johnical Rayong Ngipa minta Gerempung Apai Indai enggau Pengajar (PIBG) besaup tulang sereta penemu enggau bala pengajar dikena ngangkatka penyulut ba sukut akademik tauka kokurikulum sekula.

Kenu ku iya, kerejasama tegap kededua piak nya ukai semina ulih ngangkatka penyulut pelajar tang mega ulih mantu nembiak ransing agi belajar nyentuk ngagai tikas pelajar tinggi.

“Aku deka apai indai seruran nemu tikas pelajar anak lalu anang semina ngelempaika tanggungpengawa ngajar nya ba raban pengajar aja.

“Nyema nembiak rindu sereta nyulut ba kokurikulum, kitai ke apai indai enggau ketuai patut nyukung peneka sida awakka lebih mujur dalam bidang ke dipilih dudi hari,” ku iya.

Iya madah munyi nya rambau bejadika Program Seati Apai Indai enggau Pengajar 2017 ba Sekula Sekondari (SMK) Engkilili ke bela digulu Kaban Parlimen Lubok Antu Datuk William Nyalau Badak ba balai besai sekula nya, ensanus.

Tambah mega, endang udah nyadi juluk perintah nengeri ke diiring Kepala Menteri Datuk Patinggi Abang Joharu

Nyema nembiak rindu sereta nyulut ba kokurikulum, kitai ke apai indai enggau ketuai patut nyukung peneka sida awakka lebih mujur dalam bidang ke dipilih dudi hari. Dr Johnical Rayong Ngipa ADUN Engkilili

Tun Openg dalam nentuka penyulut akademik enggau kokurikulum ungkup raban nembiak ti dikeandal nyadi ketuai dudi hari.

“Nya alai, penumbuh Opis Menteri Pelajar ba kabinet nengeri tu diiring ex-pengajar, Dato Sri Michael Manyin Jaong diperati ngelai pengeransing perintah ngangkatka pekara pelajar ba nengeri tu,” ku iya.

Ku iya mega, prinsipal disengkaum nyadi pengajar, apai indai nengah PIBG patut seati lalu enda ibuh kelalu malut pekara pelajar enggau politik laban nya enda manah sereya nadai kaul pemutus akademik nembiak.

Dr Rayong mega minta bala nembiak ke kurang nyulut ba akademik anang ngetu belajar tang ambi peluang nampung pelajar ngagai palan pematih ba vokasional.

Nerang silik, dia Dr Rayong deka SMK Engkilili nyadi sekula iru dalam ngangkatka pengelandik nembiak ba Jaku English berindik ari penyulut sekula tu ba bidang akademik enggau kokurikulum ngarika Pelilih Lubok Antu enggau Sri Aman.

“Tu seraris enggau juluk perintah nengeri deka meda baru raban nembiak landik bejaku English sereta dikena nangkup pengereja pengawa landik enggau jelan pengelandik manggai taun 2030,” ku iya.

“Ngelansa pasal Sekula Kurang Nembiak ( SKM) ke ngaul pengawa ngempung nembiak, aku ke nyadi pengari rayat ngelalau apai indai anang kelalu irau laban perintah ukai deka ngenusah tang ngambika bela teulihka pemaik,” ku iya.

Nyalau lebuh bejaku ba pengawa nya madah penyulut pelajar aja enda nyamin bulih pengawa tang sida ke udah abis sekula patut ransing nyikap diri empu enggau mayuh penemu ngambi ngemuntangka sida besemekih enggau orang bukai napi dunya pengawa ke nadai besekat.

“Dikena meransang bala nembiak ke deka ngambi peresa SPM taun tu, aku deka meri RM100 ungkup sida ke genap iti A pengudah nerima pemutus peresa ila,” ku iya.

Ba program nya mega, Dr Rayong mega bisi nyuaka geran MRP RM5,000 enggau RM3,000 ngagai PIBG SMK Engkilili sereta raban PSKPP sekula nya.

Udah nya, Nyalau ngungkupka belanja RM20,000 ngagai PIBG sekula tu ngatur aktiviti akademik enggau kokurikulum.

Sama bisi datai iya nya prinsipal sekula, Ganis Abi, Pemesai Opis Kaunsil Lubok Antu Thomas Kanyan, pengari YDP Bangau Ngali, kaunsilor, tuai-tuai rumah sereta apai indai nembiak.

PEMERI KAMI: Ganis (dua kiba) nyuaka tepa ngagai Nyalau seraya dikemata Dr Rayong (dua kanan), Bangau (kiba) enggau bala bukai pengudah tembu program nya ensanus.

Newspapers in Malay

Newspapers from Malaysia

© PressReader. All rights reserved.