Perintah Besai, MPIC dikearap berundingka peminta MPB: Mawan
Peminta numbuhka ‘Jaringan Keselamatan Sosial’ nya ke pemaik pekebun lada maya rega lada enda manah
KUCHING: Peminta numbuhka mekanisme ‘Jaringan Keselamatan Sosial’ ungkup pekebun lada, dikearapka ulih diperundingka perintah besai enggau Opis Menteri Kebun Bedandang Besai enggau Komoditi (MPIC).
Chairman Kaunsil Lada Malaysia (MPB) Tan Sri William Mawan Ikom madah, mekanisme nya ulih mantu pekebun lada kelebih agi maya rega lada turun.
“Kitai ngarapka perintah besai enggau MPIC ulih berundingka peminta MPB ti deka numbuhka mekanisme Jaringan Keselamatan Sosial ungkup pekebun lada dikena ngelempungka penanggul sida lebuh rega lada ba tikas ti enda manah.
“Enti mekanisme ti baka tu ulih ditumbuhka ba sektor nanam getah, aku arap bendar pekara ti sama mega ulih dipejalaika ba sektor nanam lada di Malaysia.
“Insentif maya rega lada ti enda meruan patut diberi ngagai pekebun lada kelebih agi di menua pesisir ti agi bepanggai semina ngagai pengawa betanam lada ke nyadi aktiviti dikena ngiga belanja ke ruang bilik,” ku iya.
Mawan mansutka peminta nya dalam jaku pengelalu pengerami ngintu genap 10 taun MPB enggau Pesta Lada 2017 ke diatur MPB ba sebuah hotel ditu, kemari.
Pengerami nya udah mujur dipenyadika Menteri Menteri
Kitai ngarapka perintah besai enggau MPIC ulih berundingka peminta MPB ti deka numbuhka mekanisme Jaringan Keselamatan Sosial ungkup pekebun lada dikena ngelempungka penanggul sida lebuh rega lada ba tikas ti enda manah. Tan Sri William Mawan Ikom Chairman Kaunsil Lada Malaysia (MPB)
Kebun Bedandang Besai enggau Komoditi Datuk Seri Mah Siew Keong.
“Kami minta kasih perintah besai enggau opis menteri ngambika ulih berunding sereta beratka peminta MPB ti deka numbuhka Jaringan Keselamatan Sosial ke ulih mantu pekebun lada.
“Kami amat ngarap kelebih agi MPB ti deka meda semua komoditi besai di Malaysia ulih sama dijaga enggau bulih penguntung ti sebela ari program enggau perambu ke dipejalaika perintah besai enggau opis menteri,” ku iya.
Berebak enggau tu, taja pan rega lada diatu enda tentu meruan tang Mawan meri peransang ngagai pekebun lada ngambika terus chakah nanam sereta ngeluarka asil lada bekualiti awakka ulih napi peminta makit enggau pemeli baru makit dunya.
Naka ke sehari tu (kemari) rega lada ba tikas ti tegap iya nya urung RM17,10 sekilo lada chelum enggau urung RM25.33 sekilo lada burak, sereta nya ngayanka bisi niki urung 60 nperatus lebih agi lada chelum, ku iya.
Nyerumba pengerami nya, Mah mega diberi basa bejadika aplikasyen “Dr. Lada” enggau bup resipi ti bepelasarka lada ari MPB.
Aplikasyen “Dr. Lada” ti ngena chara online dikemansangka MPB enggau juluk deka meri penerang ngagai pekebun lada enggau chara mutarka penyakit ke suah nyadi ba lada.
Bup resipi ti bepelasarka lada ke diberi nama bisi nyendiaka 25 resipi pemakai menua tu enggau antarabansa ti diasilka ngena chara kerejasama tiga iku pakar kulinari ari UCSI Univerisity.
Sama bisi datai ngagai pengemai nya, Sapit Menteri Perusahaan Perladangan dan Komoditi Datuk Datu Nasrun Datu Mansur, Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas enggau ke bukai.