FORUM deka ngintu pengerami makai selamat ungkup KM enggau bini iya

Utusan Borneo (Sarawak) - - Berita Iban -

MIRI: Kepala Menteri Datuk Patinggi Abang Johari Tun Openg enggau bini iya, Datin Amar Datuk Juma’ani Tuanku Bujang deka dirami ba sebengkah pengerami makai lemai diatur Gerempung Serakup Orang Ulu Malaysia (FORUM).

Presiden FORUM, Antonio Kahti Galis madah, pengerami nya deka diatur di Hotel Imperial kena 4 November.

“Pengerami tu diatur dikena ngerami sereta makai selamat iya ti udah dipadu nyadi Kepala Menteri dalam pengelantang.”

“Kelimpah ari mantaika sukung Orang Ulu ti di baruh FORUM ngagai iring iya ti nyadi ketuai,” ku Antonio rambau aum pengarang berita pengudah aum begulai enggau komiti FORUM di Hotel Dynasty kemari.

Ku Antonio, pengerami nya diatur begulai semilan serakup Orang Ulu di baruh pegai FORUM iya nya Serakup Kayan Sarawak (PKS), Serakup Kenyah Nasional Sarawak (PKKS), Serakup Lakiput Sarawak ( PLS), Rurum Kelabit Sarawak (RKS), Serakup Lun Bawang Sarawak (PLBS), Serakup Berawan Sarawak ( PBS), Serakup Komuniti Saban Miri ( PMSM), Serakup Penan Petipun Sarawak (PETIPUN) sereta Serakup Bisaya Sarawak (PBS).

Ku iya, tikit makai lemai tau dibeli di serakup sida empu lalu pemerat deka diberi ngagai bala kaban aja.

Ba lansa ke bukai, chairman pengatur pengerami, Kaban Kunsil Nengeri ( ADUN) Telang Usan ke lalu nyadi Presiden PKS, Dennis Ngau madah, FORUM deka mantaika main asal pemadu manah enggau adat ti engkeman eng- gau penuduk Abang Johari ke nyadi kepala menteri.

“Batang pengerami makai lemai iya nya meda kededua temuai dipebasa, Abang Johari bejalai ba atas lapan tawak ti dirintai.”

“Tu nyadi basa pemadu tinggi diberi ngagai raban pemesai lalu ukai baka pengerami makai lemai bukai. Kelimpah ari nya, pengawa mandangka main asal ari tetiap bansa ti sebedau jarang dipeda,” ku Dennis.

Ku iya nambah, pengerami besai ti kala diatur FORUM nya kelai sukung ngagai Abang Johari.

Kelimpah ari nya, bisi 100 iku nembiak sekula ti ngarika semilan etnik Orang Ulu deka ngena pekayan asal sida empu nyambut penatai Abang Johari enggau bini iya.

Diadang bisi 700 iku temuai deka datai ngerichahka agi pengerami nya ila.

Newspapers in Malay

Newspapers from Malaysia

© PressReader. All rights reserved.