Pesta Limau Bintangor diatur semilan hari, 22-30 Oktober

Utusan Borneo (Sarawak) - - Berita Iban -

BINTANGOR: Pesta Limau Bintangor deka diatur pengelama semilan hari berengkah 22 nyentuk 30 Oktober tu

Mayuh aktiviti udah ditusun piak pengatur dikena ngerichahka agi program nya.

Pemesai Opis Kunsil Meradong Haron Mahidi madah, naka diatu bisi 28 aktiviti manah udah dirintai deka diatur sekumbang pengerami nya ila.

“Sebagi ari aktiviti ti manah disadang matak penatai temuai ngelawa pengerami tu ila baka beperindang enggau artis tebilang Iban, pekit karaoke, ratu pesta limau, ‘ strongman’, ‘ autoshow’, bejalai beraban mai tanglung, kerita berias enggau mayuh agi ke bukai.

“Lebih 10,000 temuai disadang datai ngulu pengerami tu ila.

“Berebak enggau pengerami tu, kami mega deka ngatur pekit lumba bot lalu dipelaba matak penyereta ari menua Brunei enggau Sabah,” ku iya, ensanus.

Pengeami tu endang sebengkah pelasar dikena nanggam kaul mensia mayuh kelimpah mantu peranak ke besemak ngulihka penatai pemisi nengah pengawa bejual produk betanam betupi enggau asil kraf jari.

Pengerami ke diatur kenyau lima taun ke udah tu endang nyadi sebengkah pengerami besai nyadi kelai buah limau iya nya utai tumbuh ke pemadu tebilang ba pelilih tu.

Kelimpah mandangka penyelai pelilih Bintangor, pengerami tu mega meri peluang ekonomi ngagai pedagang mit ba menua tu nengah pengawa muka palan bejual ke disedia piak pengatur.

“Nya alai, kitai ngarap pengerami ti digembar enggau mayuh aktiviti ulih nerima sukung ari peranak ke besemak,’ ku iya.

Newspapers in Malay

Newspapers from Malaysia

© PressReader. All rights reserved.