Kelebih agi ba peranak ti kena pangka kededua kuasa Hidroelekterik (HEP) Bakun enggau Murum ti enda dikeibuhka

Utusan Borneo (Sarawak) - - Berita Iban -

KUCHING: Peranak Murum kelebih agi ti kena pangka kededua kuasa Hidroelekterik ( HEP) Bakun enggau Murum minta perintah ngamatka semaya.

Kaban Kunsil Nengeri Murum, Kenndey Chukpai Ugon madahka peranak ti kena pangka kededua tekat ai ba Skim Pengentap Pendiau Baru Bakun ( BRS), Tegulang enggau Metalun ngasaika sida enda dikeibuh, nya kebuah sida ngansak perintah mutarka isu nya memanah.

“Aku deka majak mantaika semaya ngagai sida ti kena pangka dua tekat ai HEP besai ba DUN tu nyentukka nya dikeamat. Sida udah ngemendarka tanah aki ini diri endur ngaga tekat ai besai tu lalu sida mega udah chukup liat ati nganti pengamat semaya tang hak enggau pengelantang sida enda dikeibuh,” ku Chukpai madah lebuh ba pejurai iya nyukung Rang Undang-undang Perbekalan (2018) ba Aum Kunsil Nengeri ditu kemari.

Iya nyemetak madah, antara peminta peranak iya di Murum iya nya penyikap perengka guna baka bekal ai beresi enggau kuasa karan ngagai semua rumah panjai ba kandang menua nya nengah Alternatif Bekal Ai Menua Pesisir Sarawak (SAWAS), Skim Bekal Kuasa Karan Menua Persisir (RES) enggau Alternatif Skim Bekal Kuasa Karan Menua Pesisir (SARES) sereta ke bukai.

“Diatu, agi mayuh rumah panjai dalam sitak aku nadai penyikap perengka guna tu. Kelimpah ari nya, aku ngarapka sekula menua pesisir baka SK Lusong Laku, Sk Long Urun, SK Kuala Kebulu, SMK Bakun, SK Batu Keling, SK Long Gang, SK Tegulag enggau SK Metalun dikemanah ngambika sida bisi palan ke kondusif agi, lantang sereta enda tinggal ba pengawa nempa modal mensia ke bekualiti dikena ngangkatka Sarawak ngagai tikas ke tinggi agi,” ku iya.

Chukpai mega nyemetak madah pematut perintah ngeyampatka pengawa meri 922 lot ari baruh Seksyen 18, baka ti dikemendarka Sapit Kepala Menteri Tan Sri Datuk Amar Dr James Jemut Masing ba pengawa bepilih nengeri suba. Iya mungkur tanah premium rega manggai RM888,510.

“Kelimpah ari nya, kami mega deka minta ari perintah mayar pulai tanah RM2,343,042 ngagai 1,178 ngagai ruang bilik kena pangka, ti udah ditulak ari bayar pampas tanah sida. Nyema tanah diberi ari baruh Seksyen 18 (Perpetuiti), tanah enda bebayar lalupremiumdeka diberi pulai ngagai sida,” ku iya.

ADUN Murum ti penggal keterubah nya mega minta 2,450 ekar tanah ti enda manah endur betanam nya diganti.

“Kami ngarapka Opis Tanah enggau Survei ngenyampatka pengawa meri tanah ti ami agi ungkup komuniti kena pangka laban palan udah dikelala,” ku iya.

Chukpai mega ngansak perintah meri tambah tiga ekar tanah ungkup sepintu baka ti udah disemaya Menteri Besai Datuk Seri Najib Tun Razak di Uma Belor,kena 16 Januari 2011.

“Kami deka minta tambah tanah ungkup betanam betupi enggau ngentak rumah ngagai ruang bilik 1,264 ti majak nambah di BRS, Sg Asap,” ku Chukpai.

Ba isu bekaul, iya mega mantaika pematut perintah meri 302 lot endur berumah enggau 284 lot betanam betupi ngagai peranak di Metalun enggau Tegulang.

“Kami ngarapka pengawa ngeluarka pala tanah dikejampat ngambika peranak ulih ngaul diri ba betanam betupi komersial lalu nengah nya deka mantu ngangkatka tikas pengidup sida,” ku iya nyemetak.

Nengah awak nya mega, Chukpai ngansak perintah ngangkatmanah jalai kompeni kayu batang ke suba di Metalun enggau Tegulang enggau jampat laban sida nadai jalai alternatif ke bukai.

Aku deka majak mantaika semaya ngagai sida ti kena pangka dua tekat ai HEP besai ba DUN tu nyentukaka nya dikeamat. Sida udah ngemendarka tanah aki ini diri endur ngaga tekat ai besai tu lalu sida mega udah chukup liat nganti pengamat semaya tang hak enggau pengelantang sida enda dikeibuh. Kenndey Chukpai Ugon Kaban Kunsil Nengeri Murum

CHUKPAI

Dikarang Rengenyan Labang enggau Jacqueline R. David

Newspapers in Malay

Newspapers from Malaysia

© PressReader. All rights reserved.