Perintah dipinta nyendiaka pelin besai ungkup pemansang Pasar Debak

Utusan Borneo (Sarawak) - - Berita Iban -

KUCHING: Pasar Debak bisi potensial nyadi palan pemansang ekonomi peranak ba Kunsil Nengeri (DUN) Saribas berindik ari penyampau tubuh ke majak mayuh.

Mohamad Razi Sitam (BNSaribas) madah, perambu penemu ngagai peminta pasar Debak diberi pemansang baru iya nya ngaga ‘remaster plan’ dikena ngemansangka pasar baru, udah kala dibantaika sebedau tu.

“Nya alai, aku ngenataika peminta ngambika perintah nyendiaka sebengkah pelin besai ungkup pasar Debak ti disikap enggau perengka guna pemansang ba pelilih menua tu.

“Lebih mayuh premis orang dagang baka palan bejual bumiputera digaga ba pasar tu dikena mantu orang dagang menua tu ke majak nambah.

“Sereta patut mayuh agi jalai tama pansut ti nyambung genturung pendiau enggau rumah panjai ngagai pasar tu,” ku iya lebuh ti bejuraika Rang Undangundang Perbekalan (2018), 2017 enggau Mosyen ke dibantaika Kepala Menteri maya baum ba Kompleks DUN ditu kemari.

Berebak enggau tu Razi mega bisi ngenang pasal pengelemi servis telekomunikasiyendalam sitak nya.

Nitih ku iya, ba sitak ke diarika iya bisi tiang tel- ekomunikasyen kelebih agi ba Kpg Tuie, Serabang, Mangut enggau Medang tang nadai agi kurang meruan.

Servis nya patut dikemanahka agi lalu penyampau tiang telekomun ikasyen dalam sitak nya patut ditambahka agi, ku iya.

“Aku minta ngambika ‘wifi’ tauka internet ba sitak ke diarika aku ulih ditambahka ngagai 4G kelebih agi ba pasar Debak,” ku iya.

Lebuh ke ngenang pasal penanggul dokumen kad pengelala, Razi ngarapka Opis Menteri dalam Nengeri enggau Opis Pengerejista Bansa beratka pekara nya sereta ngelengkaska proses pengerejista kelebih agi ba nembiak ke ba sekula primari.

Enti enda diproses enggau lengkas ku iya, nya deka ngenusahka nembiak mit kelebih agi lebuh sida deka nampung pelajar ngagai renggat tinggi sereta maya minta pengawa.

Kelimpah ari nya, Razi beterima kasih ngagai perintah ti udah meri perambu projek ganti penuh SK Sebemban di dalam RMK-11 ti berenga RM15.5 juta.

Iya ngarapka pengawa ngaga sekula nya ulih dilengkaska berengkah taun baru laban sekula nya betapi enggau penanggul tanah tusur ba tebing sungai ke balat ti ulih ngeruga pengelikun pengajar enggau nembiak.

Newspapers in Malay

Newspapers from Malaysia

© PressReader. All rights reserved.