MDK nerima puji pengudah ngemujurka LA21 ba enam bengkah endur

Utusan Borneo (Sarawak) - - Berita Iban -

SIBU: Pengeransing Opis Kaunsil Kapit (MDK) ngemujurka Local Agenda 21 (LA21) enggau ngatur Program Pemansang Komuniti ba enam bengkah endur semanjai taun tu dipuji.

Kaban Parlimen Ulu Rajang Datuk Wilson Ugak Kumbong madahka pengawa MDK tu besai reti ngagai pemansang di menua pesisir lebih agi di rumah panjai.

“Nengah program tu, MDK tau bendar ngembing orang rumah panjai sentang pengawa ngintu pemeresi rumah, kelimpah ajar bukai baka besaup ngetan sereta ngintu rampa menua ari program LA21.

“Pia mega, ejensi perintah ke bukai bela bisi mantaika licha ba program pemansang mensia mayuh ti deka mai runding rayat ngemansangka diri,” pia ku iya madah.

Iya mantaika jaku puji nya maya bejadi Program LA21 enggau Pemansang Komuniti Zon Belaga di Uma Sekapan Panjang, Baleh, empai lama tu tadi.

Ku Ugak, program baka nya engkeman diatur laban digulu mensia mayuh ba menua pesisir seraya ti meri awak ngagai sida betemu enggau pengari rayat kelimpah mayuh bengkah ejensi perintah ke bukai.

Ari nya ku iya, mensia mayuh bisi awak mantaika penanggul enggau buah penemu sida.

Bekaul enggau pemansang menua, iya madah, perambu projek ngaga Tebing Sungai Belaga ari MDK deka ngubah rampa menua pasar Belaga.

“Projek tu beguna amat ngagai rayat kelimpah nyediaka palan alai ngatur pengerami baka ‘Belaga Rain Forest Challenge’ enggau ‘Belaga Fest’,” ku iya madah baru.

Ba pengawa ngemanah jalai ari Menjawah ngagai Belaga, ku Ugak, Opis Kereja Raya ( JKR) diadang deka ngemansangka jalai nya ngena puku RM30 juta.

Ketegal nya, iya andal amat rayat ulih besabar sereta enda begilik sukung ngagai Barisan Nasional (BN) maya Pengawa Bepilih Besai (PRU) ti deka datai.

Ba pengerami tu, Ugak bela bisi nyuaka geran RM20,000 ngagai Komiti Pengelikun enggau Pemansang Pendiau Genturung Menua (JKKK) Uma Sekapan Panjang enggau RM6,000 ngagai Biro Raban Indu JKKK Uma Sekapan.

Sama bela datai maya pengerami tu iya nya Sekretari Politik Ngagai Kepala Menteri Michael Mujah enggau Kedoh Tajang, Walikota MDK Philomon Nuing, Sapit iya Lawrence Listin Baling, Sekretari Jabang Juntan enggau chairman komiti pengatur program Among Matu.

KE ALBUM: Tiong (empat kanan), Groves (lima kanan) enggau Balsamo (lima kiba) begulai enggau bala speaker sereta bala bukai.

Newspapers in Malay

Newspapers from Malaysia

© PressReader. All rights reserved.