Semua piak patut ngemeratka nembiak ti begunaka bantu khas

Utusan Borneo (Sarawak) - - Berita Iban -

SIBU: Tanggungpengawa mantu nembiak ti begunaka bantu khas ngambika ulih ngatika diri bepanggai ba semua piak, pia ku Chairman Sibu Municipal Council (SMC) Datuk Tiong Thai King.

“Bala lutur enggau pengajar di Sibu suah madahka aku mayuh nembiak ti begunaka bantu khas ditu, iya nya tetiap sekula meseti bisi sida,” ku iya.

“Anang enda ingat anak tu diberi ke kitai ari Petara, ti dekaka semua orang nyaga anak sida,” ku iya nambah.

Tiong mansutka jaku lebuh bejadika pengawa nutup konferen ke-4 Special Education Network in Malaysia (SENIM) di Wood- lands International School ditu.

Konferen dua hari berunggu udah digulu urung 400 iku pesereta datai ari serata menua Asia.

Ku Tiong ngelansa, isu bekaul enggau pengelantang, pelajar enggau pengerai nembiak ti begunaka bantu khas endang pekara ti beguna endar ngagai peranak Sibu.

Dalam taun 2006, ku iya, Agape Centre udah ditumbuh nyadi pelasar komuniti ngagai mayuh gempung ngambika gawa begulai ungkup nembiak ti begunaka bantu khas.

“Sehari tu, lebih ari 5,000 iku udah teulihka pemaik ari servis nya lalu tetiap minggu, beratus iku nembiak mit datai ngulu bemacham program di palan nya.

“Kami semina bisi siti tuju aja – deka nyaup nembiak ti begunaka bantu khas enggau sida sebilik. Intervensyen tumu enggau latih disedia ungkup sida,” ku iya.

Ngelansa pasal konferen nya, ku iya, batang tuju ngagai bala pesereta iya nya belajar pasal pelajar inklusif ke alai sida belajar begulai nyerumba pemansang tipikal dalam kelas arus perdana.

Sama bisi datai rambau atur konferen Chairman Pengatur Aubrey Groves enggau Chairperson Senim Kathryn Balsamo.

Newspapers in Malay

Newspapers from Malaysia

© PressReader. All rights reserved.