Kandang menua adap ke ili amat begunaka akses jalai alun

Utusan Borneo (Sarawak) - - Berita Iban -

KUCHING: Peranak rumah panjai ti mungkur ari Menuang ngagai Langgir Lingga, ari Semulong Ulu ngagai Semulong Ili, Lingga sereta ari Selanjan Angkong ngagai Enciap, Pantu dalam sitak Kunsil Nengeri Bukit Begunan, amat begunaka perengka guna jalai alun.

Datuk Mong Dagang (BNBukit Begunan) madah, sekeda peranak rumah panjai nya ke diatu bepanggai ba perengka pengangkut ai lebuh deka mindah.

Iya madahka peranak rumah panjai ari kandang menua betapi enggau penanggul nya kenyau betaun ke udah.

“Aku minta ngagai opis menteri ti bekaul ngambika ulih ngungkupka belanja dikena ngaga jalai alun ngagai beberapa rumah panjai ari Menuang ngagai Langgir Lingga, ari Semulong Ulu ngagai Semulong Ili, Lingga enggau ari Selanjan Angkong ngagai Enciap, Pantu.

“Peranak rumah panjai kelebih agi ari Langgir ngagai Enciap bepanggai ba sungai mit nyadi jalai ti ditengah sida. Penanggul ke ditapi sungai nya ke lalu mit sereta pabu lalu sida enggai enda pan nganti ai pasang,” ku iya.

Mong mansutka pekara nya lebuh bejuraika Rang Undang-Undang Perbekalan ( 2018), 2017 enggau Mosyen ke dibantaika kepala menteri, maya Aum Kedua Penggal Kedua Aum Kunsil Nengeri Sarawak Ke-18, ba Kompleks DUN ditu, lemai kemari.

Dulu ari nya Mong lebuh ke ngenang pasal program ‘ Kampung Tanpa Wayar’ ke ditumbuhka ba sekeda genturung pendiau sereta rumah panjai ke dipilih di serata nengeri tu, nyendia penyambung internet ngagai mensia mayuh.

Taja pia ku iya, mayuh kereban ‘Kampung Tanpa Wayar’ enda ulih dikena agi ketegal mayuh penanggul.

Iya ngasaika program ke udah bisi nya patut ulih dikemanahka baru setipak enggau juluk perintah ti bejalaika pemansang ekonomi digital di nengeri tu.

“Nya alai aku minta, sekalika bisi pematut perintah meda lalu ngemanah enggau ngidupka baru kereban tu ke endang udah bisi.

“Tu chara kitai ngajar mensia mayuh di menua pesisir bekaul enggau pemansang teknologi baru,” ku iya seraya madahka diri nyukung Bajet 2018 ke dibantaika Kepala Menteri Datuk Patinggi Abang Johari Tun Openg ba hari keterubah aum kunsil nengeri minggu nyin tadi.

Newspapers in Malay

Newspapers from Malaysia

© PressReader. All rights reserved.