Tujuh buah sekula ke udah tuai sereta jai di Lundu dikearap dikemanah nengah Bajet 2018, ku Jamilah

Utusan Borneo (Sarawak) - - Berita Iban -

KUCHING: Tujuh ari 415 buah sekula di Sarawak ke dipadahka sekula tuai tauka jai di pelilih menua Lundu kena bungkur dalam Bajet 2018 ti dibantai Menteri Besai Datuk Seri Mohd Najib Tun Razak, apin lama udah.

Kaban Kunsil Nengeri ( ADUN) Tanjung Datu, Datuk Amar Jamilah Anu madahka tujuh buah sekula di Lundu nya, SK Telok Melano, SK Pueh, SK Pugu, SK Rambungan, SK Stunggang Temelan enggau SK Sebat.

“Sekula nya ukai semina patut dikemanah kelebih agi bilik kelas, tang mega kuarters pengajar mega patut dikemanah baru.

“Aku ngarapka Opis Menteri Pelajar, Sains enggau Pansik Teknologi ulih dikemeratka dulu,” ku Jamilah madah lebuh mantaika ‘debat’ Bajet 2018 ba Aum Kunsil Nengeri ditu, kemari.

Ba bagi sekula sekondari ku iya, SMK Sematan nadai agi pagar ngelingi laban udah kelalu lama sereta udah rubuh.

“Pengerusak pagar tu ngirauka ati ba bala nembiak dia kelebih agi nembiak ke diau ba buding, laban kala nyadi buding sida iya ditama orang luar.

“Aku ngarapka penanggul tu ulih diputar enggau naka pengelengkas laban enti enda diputarka, enggaika pengelikun nembiak dia dikeruga,” ku iya seraya madahka sekula di Lundu begunaka makmal sains lalu wayar elekterik di sekeda sekula nya mega patut diperesa.

Kelimpah ari nya, iya madahka SMK Lundu begunaka rumah sekula baru ungkup Pendidikan Khas alai 70 iku nembiak nyelai pendiau belajar, ke alai pekara nya tu patut dikemerat.

“Diatu, semina tiga buah kelas enti nitih chukup kena 21 iku nembiak. Sekula nya mega begunaka sebuah palan macha baru lalau wayar elekterik di sekula nya mega enda tau enda diperesa,” ku iya.

Berebak enggau nya, ADUN Kabong Mohamad Chee Kadir bisi nanya Menteri Pelajar, Sains enggau Pansik Teknologi pasal kemaya sekula SK Abang Leman, Kabong deka berengkah digaga lalau kemaya sekula nya dijangka tembu.

Menteri Muda Pelajar, Sains enggau Pansik Teknologi, Dr. Annuar Rapaee madah, sekula nya deka digaga ari baruh RMK ke-11, lalu konsultan projek nya udah dipadu lalu diatu, benung dalam proses tinda.

Ba tanya ari Mohamad Chee baru bekaul enggau kemaya SK Haji Junid Gerigat enggau SK Engkabang, Roban deka digaga lalu kemaya tembu ?.

Dr. Annuar, skop kereja SK Haji Junid Gerigat enggau SK Engkabang Roban udah dikelala lalu deka dikenukuka ujung taun tu.

“Pengawa ngaga berengkah dalam bulan Januari 2018,” ku iya.

MINTA DIKEMERAT: Jamilah minta Bajet 2018 ungkup dikena ngaga sekula, ngemeratka dulu sekula ke udah tuai sereta jai di Lundu.

Newspapers in Malay

Newspapers from Malaysia

© PressReader. All rights reserved.