Majang minta pengawa ngemanah jalai Ulu Suai dikemendarka jampat

Utusan Borneo (Sarawak) - - Berita Iban -

KUCHING: Majang Renggi ( BN- Samalaju) minta pengawa ngemanahka jalai Ulu Suai ti semanjai 48 kilometer dikemendarka enggau lengkas.

Iya madahka infrastruktur nya beguna amat dikena nyambung rumah panjai, sekula sereta klinik enggau ke bukai ba kandang menua nya.

Nambahka nya, ulih ngemudahka peranak ti deka mai asil ari pengawa bekebun baka sawit.

“Aku minta opis menteri ti bekaul ngambi ngelengkaska proses ngemendar pengawa ngemanahka jalai Ulu Suai semanjai 48 kilometer.

“Jalai tu deka nyambung empat buah sekula primari, sebuah klinik desa, 19 buah rumah panjai enggau lima buah genturung pendiau.

“Jalai tu mega beguna amat ngagai pekebun mit enggau estet mini, ke alai urung 5,000 tan berat tandan buah baru ( FBB) ke dikeluar tauka dibai nengah jalai tu ninting bulan,” ku iya.

Majang mansutka pekara nya lebuh ti bejuraika Rang Undang- undang Perbekalan ( 2018) enggau mosyen ke dibantai kepala menteri, ba Aum Kedua Penggal Kedua Kunsil Nengeri Sarawak Ke-18 ba Kompleks DUN ditu, kemari.

Bejaku baru iya mdahka dalam sitak ke diarika iya mega betapi enggau penanggul bekal ai beresi baka kandang menua Suai enggau LKTS Suai.

Iya minta sereta ngarapka opis menteri ti bekaul ulih berati lalu mutarka penanggul nya enggau naka pengelengkas ke ulih laban rayat bisi hak ngena bekal ai beresi.

“Udah kelalu lama peranak ba kandang menua tu bepangggai ba ai ujan enggau ai ari sungai ke guna sida iya.

“Aku ngarapka piak ke bekaul ulih datai sereta beratika sekalika pemansut bekal ai alternatif baka projek Bekal Air Alternatif Menua Sarawak ( SAWAS) tauka chara bukai ke ulih dikena nyendiaka bekal ai beresi ba kandang endur nya,” ku iya.

Kelimpah ari nya Majang madahka Bajet 2018 chukup manah sereta enda ninggalka pemansang menua pesisir tang terus mai transformasyen kandang menua pesisir nuju ekonomi digital negeri.

Ngarapka ungkup belanja sepenyampau 53 peratus ari bajet pemansang tauka RM3.062 billion ti diungkupka ngagai pemansang menua pesisir ulih beratka ‘ Development Biased and Rural Focused’ lalu ulih ngenyampat enggau ngenyakahka projek mit.

Newspapers in Malay

Newspapers from Malaysia

© PressReader. All rights reserved.