TDM seruran chakah nentuka pengelikun ba garis entara menua: Zaki

Utusan Borneo (Sarawak) - - Berita Iban -

MIRI: Soldadu Darat Malaysia (TDM) deka seruran ransing nambahka agi pengawa matau garis entara menua dikena nentuka tikas pengelikun di pantai timur kelebih agi Sarawak enggau Sabah.

Panglima Medan Timur Tentera Darat, Leftenan Jeneral Dato’ Wira Mohd Zaki Mokhtar madah kandang ke diatu tikas pengelikun di garis entara menua darat kededua nengeri ulih dipatau.

“Taja pia, kitai enda patut ilap tang terus bebendar nambahka agi pengawa matau pengelikun ngambika meruan agi dikena nyeliahka sebarang pengawa tama belalai tauka aktiviti ti enda manah di garis entara menua.

“Kelimpah ari nya, enggau pengerembai ti manah di selatan Filipina, kitai seruran berati sereta terus nyikap diri dikena nyeliahka sebarang pengawa penyelawai tama belalai ngagai menua Sabah,” ku iya.

Iya mansutka jaku nya rambau aum pengarang berita ti diatur pengudah Majlis Perbarisan Penghargaan Mejar Jeneral Dato’ Pahlawan Abdul Rahim Abdul Mutalib ke diatur di padang kawat Batalion 20 Rejimen Askar Melayu Diraja (20 RAMD) ditu, pagi kemari.

Pengawa bebaris diatur kelai ngenang pemanah pen- gawa Abdul Rahim ti deka pinchin wajib kena 15 Mac 2018 pengudah gawa 44 taun tujuh bulan enggau 10 hari dalam raban TDM.

Dulu agi ari nya, lebuhka bejaku, Mohd Zaki madahka peminchin Abdul Rahim nyadi pemuang ke besai ti enda ulih diganti laban pemesai kanan ti berkarakter baka iya mar digiga.

“Tu mih pengasai ti ditinggalka iya pengudah lebih 44 taun gawa,” ku iya.

Nikalka kenang ba pun pengawa Abdul Rahim dalam bidang soldadu, Mohd Zaki madahka Abdul Rahim berengkah nyadi Raban Soldadu Malaysia ( ATM) kena 21 April 1978.

Kena 15 Jun 1978, lebuh umur manggai 19 taun, iya udah diterima gawa di 20RAMD, lebuh nya di Kem Desa Pahlawan, Bukit China, Kelantan.

Semanjai gawa, iya udah mangku bemacham pengawa besai sekalika ba pengawa megai, matih tauka staf.

“Bepun ari mangku pengawa nyadi Ketuai Platun di 20RAMD, penyulut pengawa nyadi ketuai Abdul Rahim ditampung lebuh iya nyadi Ketuai Kompeni di 17RAMD, Pegawai Memerintah di 10RAMD, Panglima 8 Briged, Panglima 4 Briged ( Mekanize) sereta mega Asisten Panglima Pasukan Simpanan.

“Penau enggau pengangkun iya nyadi ketuai ba pengawa matih mega enda ulih disangkal lebuh kala dilempaika tanggungpengawa nyadi Timbalan Komandan di Maktab Turus Angkatan Tentera dalam taun 2008 enggau 2009,” ku iya nerang silik.

Sama bisi datai Panglima Divisyen Satu Infantri Malaysia Mejar Jeneral Datuk Stephen Mundaw sereta bini Datin Jacqueline Peris enggau Panglima Angkatan Petugas 450 Mejar Jeneral Dato’ Zulkapri Rahamat enggau bini Datin Zubaidah Mohd Zaid.

Pengawa bebaris ngenang jasa udah disereta 15 iku pemesai enggau 300 raban ke bepangkat bukai ti diketuai Leftenan Kolonel Azmi Ali ke mega Pegawai Memerintah 20RAMD.

Berebak enggau pengawa sehari nya, bela diatur pengawa bejalai nyempulang Abdul Rahim enggau bini iya pansut ti nepan entukar seraya ditarit ngena tali ari raban kelai iya pinchin gawa.

Seraya 20RAMD dipilih nyadi endur pengawa bebaris ngenang jasa berindik ari batalion nya endur keterubah iya diambi gawa lebuh terubah nyadi ATM.

UDAH ADAT: Zaki (depan) begambar ungkup kenang begulai enggau pemesai kanan iya pengudah tembu atur pengawa bebaris.

Newspapers in Malay

Newspapers from Malaysia

© PressReader. All rights reserved.