Sapit Menteri Besai minta sida baum sekalika perengka guna ba CIQS tu patut dikemanah tauka digaga baru
TEBEDU: Sebuah komiti khas deka ditumbuh betuaika Kepala Menteri Datuk Patinggi Abang Johari Tun Openg, berati sekalika pematut perengka guna di Komplek CIQS ( Custom, Immigration, Quarantine Sarawak) dikemanah tauka digaga baru, lalu deka meri kelai pemanah ngagai 10 bengkah ejensi Perintah ke bisi ba CIQS Tebedu.
Sapit Menteri Besai Datuk Seri Ahmad Zahid Hamidi madah bepelasarka pemansang sereta penemuai ngagai CIQS nya kemari, disalin dalam atur pengawa, alai komiti ke baum kemari besetuju nuduh Sapit Menteri Dalam Menua, Dato Nur Jazlan Tan Sri Mohamed ngatur komiti kereja renggat teknikal mutarka semua pengawa teknikal bekait enggau perambu nya.
“Aku meri timpuh dalam kandang 14 hari tu ungkup komiti baum lalu nangkan nya mantaika keretas jurai sida iya ngagai kami (komiti khas), lalu nangkan nya, pekara tu deka dibai maya aum Kaunsil Ekonomi betuaika Menteri Besai Datuk Seri Mohd Najib Tun Razak, seraya minta pemendar ari raban menteri.
“Kita agi bisi urung 60 hari aja ke ditetap, sebedau keretas tu dibantai ngagai raban menteri lalu minta pemutus sida iya kelebih agi ngulihka ungkup, ke bedau temu ni naka penyampau (ngaga komplek baru tauka ngemanahka agi CIQS),” ku Ahmad Zahid.
Iya madah munyi nya lebuh bejaku ba aum media, lebuh nemuai ngagai CIQS Tebedu enggau Entikong ditu, kemari.
Ahmad Zahid ti mega nyadi Menteri Dalam Menua (KDN) meri terima kasih ngagai Kepala Menteri (Abang Johari) ke komited deka ngemanah tauka ngaga baru perengka guna CIQS, alai kos ngaga tauka ngaga manah baru CIQS nya ila, deka dibayar ulih Perintah Menua (50 persin) enggau Perintah Besai ngungkupka 50 persin.
“Tu siti pengawa bekunsi ke pintar sereta kereja ke patut diperatika tiap renggat lalu ngarapka gaya ‘win-win’ bansa tu deka ngenyampatka peneka kitai beratika pemansang tu deka meri pengelantang ngagai kededua piak Malaysia- Indonesia,” ku iya.
Penemuai Ahmad Zahid ngagai garis menua entara Malaysia-Indonesia di CIQS Tebedu nya digaga, berindik ari aum kededua ketuai menua, Menteri Besai Datuk Seri Mohd Najib Tun Razak enggau Presiden Indonesia, Joko Widodo ke bisi nemuai sereta baum di Kuching kena 22 November tu tadi.
“Kitai meda dalam kandang sebulan tu, beratika baka ni CIQS di Tebedu enda tau enda ngembuan perengka guna ke sama standard tauka tikas enggau perengka guna CIQS Entikong, Indonesia.
“Lalu baka nya mega, kitai beratika sekeda perengka guna ke bekait enggau sekeda pekara enda tau enda dikemutarka, baka pemerat pengelikun di garis menua, pemerat ngena perengka guna ( Inland Port) sereta ngangkatka pengawa dagang entara Malaysia- Indonesia ulih ditambah kelebih agi lebuh ngena ( pelabuhan Kuching) tauka (pelabuhan bukai) kena mantu pengawa dagang kededua piak ulih dikemujurka,” ku iya.
Kelimpah ari nya, iya madah pemisi CIQS ke moden mega deka nambah mayuh agi pengawa dagang temuai di entara Indonesia-Malaysia, kelebih agi lebuh mayuh temuai ari Indonesia (enda nyengkaum sida ke gawa di Sarawak), masuk ngagai menua tu nengah jalai darat, ku iya.
Ba balas jaku ari Abang Johari, iya madah Sarawak besetuju ngemansangka sitak Tebedu nyadi sebuah sitak ke ulih mai pemansang ekonomi, kelimpah ari negapka pekara pengelikun di entara Indonesia-Malaysia, kelebih agi Kalimantan Barat (KALBAR) enggau Sarawak.
“Perintah Menua Sarawak besetuju mayar ungkus ngaga baru tauka ngemanahka agi Komplek CIQS di Tebedu, lalu iya enda tau enda ngembuan perengka guna ke moden, infrastruktur baka kemaya hari tu.
“Pemansang tu mega deka negapka agi kaul ke manah di entara Malaysia enggau Indonesia. Sarawak meri terima kasih ngagai Menteri Besai ke berundingka pemerat ke udah di baum entara iya empu enggau Pak Jokowi, di Kuching bulan siti nyin tadi,” ku iya.
Komplek CIQS di Tebedu diatu manggai 28 taun, lalu keterubah iya dibuka (nitihka gazet), kena 1 Julai 1989.
Sama bisi datai Menteri Penguasa Pengereja Pengawa Dato Sri Richard Riot anak Jaem, Sapit Menteri ari Opis Menteri Dalam Menua, Datuk Nur Jazlan Mohamed, Konsul Jeneral Republik Indonesia Sarawak, Jalhar Gultum, Menteri Muda Dagang Temuai, Seni enggau Adat Pesaka Datuk Lee Kim Shin, enggau Kepala Direktor Opis Imigresen Malaysia, Datuk Seri Mustaffar Ali.
Aku meri timpuh dalam kandang 14 hari tu ungkup komiti baum lalu nangkan nya mantaika keretas jurai sida iya ngagai kami (komiti khas), lalu nangkan nya, pekara tu deka dibai maya aum Kaunsil Ekonomi betuaika Menteri Besai Datuk Seri Mohd Najib Tun Razak, seraya minta pemendar ari raban menteri. Datuk Seri Ahmad Zahid Hamidi Sapit Menteri Besai Malaysia