PDRM benung nganti timbal menua Macau nangkap Jho Low ke bisi kaul enggau 1MDB
KUALA LUMPUR: Polis Diraja Malaysia ( PDRM) benung nganti timbal piak kandang menua Macau nangkap orang dagang ke mayuh endar penyarut bekait enggau 1Malaysia Development Berhad (1MDB), Jho Taek Low tauka tebilang agi enggau nama ‘Jho Low’ ke dipelabaka bisi di menua nya.
Kepala Polis Menua Tan Sri Mohamad Fuzi Harun madah iya bisi dipadahka orang dagang nya udah ngerarika diri ari Hong Kong ngagai Macau ngena feri.
“Sebedau tu, kami udah nganjung raban kami (polis Malaysia) ngagai Hong Kong ngiga Jho Low, pengudah sida iya bisi dipadah ulih piak kandang menua nya, tang udah raban polis Malaysia nya datai din, saspek udah rari nuju Macau nengah jalai tasik.
“Taja pia, berindik ari kes tu, kami udah nganjung surat pinta ngagai Macau. Kami mega udah nganjung nutis mirah nengah Polis En- tarabansa (Interpol) nengah kaul diplomatik, minta bantu menua bukai baka Emiriah Arab Bersatu ( UAE), Indonesia, India, Myanmar, China, Hong Kong enggau Taiwan.
“Diatu, kami semina nganti timbal ari Macau ngemendarka kami ngambi atur undang-undang ngiga Jho Low,” ku iya madah pengudah ngepunka Aum Besai Pengari Ninting Taun ke-83, Koperasi Polis Diraja Malaysia Berhad (KPDRM) ditu, kemari.
Aum nya digaga laban bejuraika penuduk wang koperasi nya baka kediatu.
Kena 5 Julai tu tadi, polis netapka Jho Low benung digiga diatu ketegal tasat skandal 1MDB udah rari ke Macau.
Kena 15 Jun tu tadi, Opis Imigresen udah nginsil pasport ke diempu orang dagang nya atas peminta Opis Nagang Makai Suap (SPRM) laban Jho Low dipinta pulai (ke Malaysia) mantu tasat skandal nya. — Bernama