Ungkupka belanja dikena ngaga baru sereta ngemanah Tabika, KEMAS di Sarawak: Fatimah
KUCHING: Perintah nengeri ngarapka perintah besai Pakatan Harapan (PH) ulih ngagihka belanja ungkup ngaga baru lalu nambahka ungkup belanja dikena ngemanahka Tabika enggau Taska KEMAS ke udah tuai sereta buruk di Sarawak.
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah madah, nengeri tu semina diungkupka belanja dikena ngemanahka Tabika tang nadai ungkup ngaga baru.
“Di Sarawak bisi 109 Tabika ke udah tuai sereta jai.
“Enti dipeda ba ungkup belanja ke diberi ba taun 2017, nadai agih dikena ngaga baru tang semina bisi dikena ngemanahka ti sepen- yampau RM480,000, lalu ba taun 2018 RM2.5 juta.
“Laban ungkup belanja nya kelalu mimit, perintah nengeri ngaga pemutus ngungkupka RM5.4 juta dikena ngaga baru 11 Tabika enggau Taska KEMAS ke udah tuai sereta jai ba taun 2018,” ku iya lebuh nyaut tanya tambah ari Kaban Kunsil Nengeri ( ADUN) Serembu, Miro Simuh.
Fatimah mansutka pekara nya ba sesi saut tanya ba Aum Kunsil Nengeri Ke- 18 ba Hari Keempat ke diatur ba Kompleks Kunsil Nengeri ditu, kemari.
Nitih ku iya penyampau semua kelas Tabika KEMAS di Sarawak dalam taun 2017 bisi 1,540 kelas ti mungkur 21,201 iku nembiak mit sereta bisi 79 Taska KEMAS ti mungkur 1,122 iku nembiak mit.
Ba taun 2018 bisi 1,515 kelas Tabika KEMAS ti mungkur 20,583 iku nembiak sereta bisi 87 buah Taska KEMAS ti mungkur 1,182 iku nembiak mit.
Penyampau ungkup be- lanja dikena ngatur sereta bejalaika pengawa ba semua Tabika enggau Taska KEMAS ba taun 2017 bisi sepenyampau RM39,729,780 ti nyengkaum belanja emolumen tauka mayar gaji RM29,501,114; ngemanahka tabika (RM480,000); kereban ngajar enggau belajar (RM33,277.60); bantu pemakai tambah ungkup ruang bilik kurang penatai pemisi ( RM9,715,388.59) enggau geran pekapita sepenyampau RM1,026,376,09.
Ba taun 2018 penyampau agi belanja dikena ngatur enggau bejalaika pengawa ba Tabika enggau Taska KEMAS sepenyampau RM48,059,309 nyengkaum belanja mayar gaji RM30,976,169; ngemanahka tabika (RM2,680,000); kereban ngajar enggau belajar (RM30,000); bantu pemakai tambah(RM12,912,721)eng gau geran pekapita sepenyampau RM1,460,419.
Kelimpah lebuh ti nyaut tanya sekalika Perintah Nengeri bisi perambu ngambi lalu megai tabika KEMAS ba nengeri tu, Fatimah madah, naka ke diatu nadai perambu.
Tambah mega ku iya, deka ubah ba pekara nya begunaka pansik silik.
“Naka ke diatu Opis Menteri bedau bisi perambu ngambi lalu megai semua Tabika KEMAS di Sarawak laban nya di baruh pegai Perintah Besai PH ke diatu.
“Nya alai sebarang ubah polisi perintah patut dipansik enggau silik sereta dibantai enggau dikemendarka ba renggat parlimen sebedau diterima lalu dikena kabinet nengeri,” ku iya.