KPDNHEP Sarawak nerima 50 sebana kenyau SST dipejalai
LIMBANG: Urung 50 sebana diterima Opis Menteri Dagang Dalam menua enggau Pekara Penguna (KPDNHEP) Sarawak bekaul atur Chukai Jual enggau Servis (SST) sereta 25 tangkan bekaul penyalah bukai dibaruh SST kenyau iya dipejalai kena 1 September tu tadi.
Sapit Direktor ke mega Ketuai Pemesai Penerit Adat KPDNHEP Sarawak Mohd Nawawi Abdul Rahman madah, taja pia bedau bisi ukum dipejalai ngagai bala pedgang ke puntan nitihka atur SST nya naka tu.
Iya madad, pengawa meresa enggau matau bekaul SST deka ditampung ngagai 729 premis ba serata Sarawak lalu pengawa nya mungkur 21,870 bansa barang.
“Ungkup matau SST, urung 201 pemesai penerit adat ngambi bagi ba pengawa meresa ba serata bagi menua di nengeri tu ke bela disaup Pemesai Pematau Rega kelimpah bejalaika kerejasama enggau raban ari Opis Kastam,” ku iya rambau meresa SST ba Supermarket Choon Chong ditu kemari.
Mohd Nawawi madah, piak opis menteru udah nyiri pemesai- pemesai matau Rikod Pemanah Pengawa ( KPI) lima premis ungkup siku pemesai lalu genap premis minimum 30 item dikena nentuka semua kandang endur ke dipatau lalu tu ulih nyeliah pengawa ngubah rega ba renggat perunchit.
“Ba Limbang enggau Lawas, bisi semilan iku pemesai enggau 14 penerit adat deka bejalaika pengawa matau SST ba sekeda kedai di bagi menua tu,” ku iya.
Iya madah, timbal ari mensia mayuh beguna amat nyema bisi meda barang ditikika raban pedagang peneka ati anang sanggu ngenataika ripot.
“Penguna mega ulih betelefon terus nuju lumur WhatsApp 019-2794317. Lumur tu udah dipenyadika Menteri KPDNHEP empu Datuk Saifuddin Nasution Ismail apin lama ke udah dikena ngemuntang mensia mayuh ngenatai ripot tauka sebana ke lalu deka nerima timbal ke lengkas.
Mensia mayuh ku iya patut ngenatai sebana nengah jalai ke betul. Nya kebuah kitai enda meransang bala penguna mantaika sebana ba Facebook tauka Twitter laban nya ukai jalai ke diasuh.
Mohd Nawawi mega meri tangkan ngagai bala pedagang ngambika nitih rega ke udah ditetap dikena nyeliah sida ari kena ukum.
Bela bisi datai Ketuai Pampang KPDNHEP Bagi Menua Limbang Pulnama Tarah.