‘Sibu BASE Jump’ pelasar ngelakuka dagang temuai Sarawak Nengah program tu ulih narit temuai datai ke nengeri tu ungkup dagang temuai, pengawa dagang, betanamka puku
SIBU: Pengawa ngatur ‘Sibu International BASE Jump’ endang engkeman dikena ngelakuka industri dagang temuai di Sarawak.
Kaban Kunsil Nengeri ( ADUN) Dudong Datuk Tiong Thai King pechaya pengawa ngatur BASE Jump tu mega ulih ngangkatka industri dagang temuai di Sarawak kelebih agi di Sibu.
“Taun nyin ila perintah nengeri deka ngaga Kimpin Nemuai ke Sarawak enggau batang tuju nyadika Sarawak siti ari palan terubah dipilih temuai menua luar.
“Kimpin tu nyengkaum ngatur pengawa ngangkatmanah ti dikena ngangkatka nengeri Sarawak nyadi palan ti narit ati ungkup dagang temuai, pengawa dagang enggau betanamka puku.
“Batang tuju kimpin tu iya nya dikena nambahka penatai temuai entara 15 nyentuk 18 peratus lalu timpuh diau di nengeri tu ari lima hari ngagai seminggu, ke lalu mega nambah penatai pemisi asil ari dagang temuai ungkup perintah nengeri,” ku iya.
Tiong ke mega chairman Kaunsil Mengeri Sibu (MPS) madah munyi nya lebuh ti bejaku ba pengerami makai lemai dikena ngerami pesereta Sibu BASE Jump ba Dataran Bandar Sibu Fasa II, malam kilah ensana.
Sama bisi datai iya nya Residen Sibu Charles Siaw, Presiden Gerempung BASE Malaysia Kapten (B) A. Aziz Ahmad, Presiden Gerempung BASE Australia Gary Cunningham sereta ke bukai.
Kelimpah ari nya ku Tiong, program renggat entarabansa baka BASE Jump tu ulih mantu ngangkat industri dagang temuai di Sibu lalu mega kandang menua tengah di Bumi Kenyalang.
“Pengawa ngatur Sibu BASE Jump tu endang seriris enggau pengawa perintah nengeri ti deka ngelakuka industri dagang temuai ke renggat entarabansa,” ku iya nerang.
Tiong mega ngansak Opis Menteri Dagang Temuai, Seni, Main Asal, Nembiak, Lumba enggau Main ulih ngiga chara dikena nambahka penrebai ke Sibu ngambi mayuh agi temuai ari menua luar sereta ari menua tu empu ulih datai nemuai ninting taun.
“Kitai mega ngarapka mayuh agi program renggat entarabansa diatur ba Sibu ngambika mengeri tu ulih nyadi palan endur nemuai tauka ngelantangka ati ti popular ungkup temuai di selampur dunya,” ku iya nambah.
Bejaku bekaul pesereta Sibu BASE Jump, iya muji komitmen, pengeransing enggau penyanggup sida nyereta program tu.
Beserimbai enggau tu, iya ngarapka pesereta uli ngasai pengerindang lebuh ti ba menua tu lalu mantu ngelakuka Sibu ngagai bala bakih di menua asal sida.
Sibu BASE Jump 2018 tu udah masuk ba taun ti kesepuluh udah diatur lalu udah disereta 34 iku pesereta ari 14 buah menua, udah berengkah dipejalai kenyau ari 20 nyentuk 23 September tu.
Kimpin tu nyengkaum ngatur pengawa ngangkatmanah ti dikena ngangkatka nengeri Sarawak nyadi palan ti narit ati ungkup dagang temuai, pengawa dagang enggau betanamka puku. Datuk Tiong Thai King ADUN Dudong