JBSNS nagit urung 80,000 iku nyereta HSN Renggat Nengeri Sarawak 2018

Utusan Borneo (Sarawak) - - Berita Iban - Dikarang Rengenyan Labang

KOTA SAMARAHAN: Opis Nembiak enggau Lumba enggau Main Nengeri Sarawak (JBSNS) nagit urung 80,000 iku orang ngambi bagi dalam 177 bengkah lumba enggau main ke diatur nyerumba Hari Lumba enggau Main Menua ( HSN) Renggat Nengeri Sarawak 2018.

Direktor iya, Mohd Nizam Ismail ngarapka pemayuh penyereta sereta aktiviti HSN renggat nengeri ulih ditambah sereta dikemanahka agi jemah ila awakka ulih ngelui ari ke dijuluk.

“Juluk kitai urung 80,000 iku orang ngambi bagi ba semua 177 atur lumba enggau main ti dipejalaika ba serata nengeri.

“Ba Kota Samarahan aja ke nyadi tuai rumah taun tu, enda kurang ari 20 aktiviti disediaka ke enda nyengkaum ke diatur kediri empu ba genturung pendiau, sekula enggau ke bukai.

“Aku ngarapka HSN tu ulih nyadi pemungkal tauka pengepun endur kitai terus ngemansang, nempa enggau ngemujurka juluk menua deka nyadi ‘Negara Bersukan’baka ti dikearapka,” ku iya.

Nizam mansutka pekara nya lebuh bejadika Hari Lumba enggau Main (HSN) Renggat Nengeri Sarawak 2018 ti diatur ba palan bebeli barang Summer Mall ditu, kemari.

Ba renggat Sarawak program HSN sekalika ba sekula, insitut pematih pengajar enggau ke bukai berengkah diatur kena 12 ngagai 14 Oktober.

“Aku ngarapka HSN tu ulih nyadi momentom ukai semina maya hari lumba enggau main tang nyadi pengawa besai ari semua aktiviti ti kitai perambu,” ku iya.

Nitihku iya tagit pesereta HSN Renggat Kebangsaan iya nya urung 1 juta iku.

Dulu ari nya Nizam madahka 2018 iya nya taun ke-4 HSN diatur sereta taun tu diatur enggau bebida ari taun ke udah.

Ku iya, sebedau tu lebih ngagai pengawa ngelakuka lumba enggau main tang ba taun ke-4 dikearapka pengawa ngelakuka nya datai ari diri empu enggau ketegal peneka diri raban bansa empu ke deka nempa budaya lumba enggau main.

“Nya alai ba taun tu kitai ngarapka tiap peranak tauka ruang bilik udah mereti sereta besedia deka nyereta aktiviti lumba enggau main lebih agi ba pengawa besai maya HSN ke dipesetuju sereta diintu tiap Hari Enam minggu kedua bulan Oktober tiap taun,” ku iya.

KELAI: Nizam ngibauka menira Sarawak ke dibai sereta disuaka dua iku raban Bomba, kelai bejadika HSN Renggat Nengeri Sarawak 2018, kemari.

Newspapers in Malay

Newspapers from Malaysia

© PressReader. All rights reserved.