Kes pemidang enam iku pemesai JPBM deka ditasat dalam timpuh sebulan

Utusan Borneo (Sarawak) - - Berita Iban - Dikarang Chris Bishop

KUCHING: Komiti nasat penusah enam iku raban pemesai Opis Bomba enggau Penyelamat Malaysia(JBPM) ke mati lemas di Puchong diberi timpuh sebulan nembuka tasat.

Direktor Bagi Operasyen JBPM Datuk Abdul Wahab Mat Yasin madah komiti nya ditumbuh kena 8 Oktober tu tadi lalu betuaika sapit diretor operasyen JBPM.

“Komiti tu diberi timpuh sebulan endur nembuka tasat. Enti bisi kerejasama ari ijinsi bukai ti bekait ti ulih meri penerang enggau jampat, engka tasat ulih ditembu jampat agi,” ku iya.

Abdul Wahab mansutka penerang nya rambau dirandau pemberita pengudah bejadi pengawa nutup Latihamal OPS MEX Kenyalang Ke-20 ke diatur du Zon Bebas Perindustrian Samajaya ditu, kemari.

Iya nambah enti kar teruwung endur penusah nyadi sereta riput ari spital ulih diterima enggau lengkas, tasat ulih ditembu enggau lengkas.

Kelimpah ari nya, Abdul Wahab mega madah siti komiti ‘ bebas’ bisi mega ditumbuh opis menteri berumah enggau kunsil.

Ku iya, komiti ti sama bela bejalaika pansik sentang penusah ke udah nyadi diarika raban penyelam, lecturer sereta orang bukai ke diasai ulih mantu.

“Kitai bejalaika pansik ari genap sukut ngambika pekara stindit operasyen ulih dikemanahka agi lalu nyeliah penusah ke sama nyadi,” ku iya.

Ba penusah ke nyadi kena 3 Oktober nya, enam pemesai JBPM mati lemas ba operasyen ngiga siku nembiak ke labuh ba lumbung lama di Taman Putra Perdana, Puchong.

Ngenang sentang Latihamal OPS MEX Kenyalang Ke-20 ke diatur sehari kemari, Wahab madah latihamal nya udah mujur diatur lalu matak 471 iku penyereta ari 18 ijinsi.

“Latih diatur enggau tuju meri peneleba sereta nyikap raban penyereta dikena napi sebarang penusah ke tau nyadi,” ku iya.

TERIMA KASIH: Abdul Wahab(dua kiba) nyuaka setipikit ngagai siku pengari ijinsi ke bisi ngambi bagi ba Latihamal OPS MEX Kenyalang Ke-20 di Kuching.

Newspapers in Malay

Newspapers from Malaysia

© PressReader. All rights reserved.